Sa shisien ka sorkar Jylla hadien ka jingjop jong ka jingpynlong ia ka tamasa ‘Winter Tale’ mynshem snem, mynta ka kynti ruh kan pynlong biang ia kane ka tamasa ka ban sdang naduh ka 19 bad kut haduh ka 21 tarik mynta u bnai ha Ward’s Lake (Nan Polok) Shillong.
Ia kane ka tamasa yn pyniaid da ka ‘The Meghalayan Age’ ryngkat ka jingiatreilang bad ka Dak ti Craft.
Kane ka tamasa (Winter Tales) kadei ka tamasa kaba ailad ia nongshong shnong ka Jylla kiba don sap kum ha ka liang ka jingdro, jingshna, ka suh ka thaiñ, ka jingshet bam, ha ka rai ka siaw bad kiwei kiwei ba kin ioh ban pyni ia ki sap ki phong jong ki. Ka thong jong kane ka tamasa ka long ruh ban hikai kumno ban nang ban pyndonkam ia kiei kiei kiba la bret sha kyndong.
Ia ki jingtip ba bniah bad ia ki tiket lah ban ioh da kaba leit ha ka website www.wintertales.in . Ka sorkar ka pyntip ba ka jingmih na kaba die ia ki tiket yn sa synniang sha ki jaka ri khunswet bad ki jaka ri tymmen. Ym donkam bai rung ia ki khynnah kiba hapoh 10 snem.