Pynkup burom ïa ka Silbiana Thubru ka Nongshong Shnong ba nyngkong
Mynta ka sngi Dorbar Shnong Namdong-B West Jaiñtia Hills, kala rakhie ïaka jingdap dap 50 snem ka shnong lane ka Golden Jubilee celebration, ha kane sngi ka lehkmen la wan ban plie pyrda da u MLA ka Thaiñ uba dei ruh u Myntri ka Sorkar jylla u ma Sniawbhalang Dhar, haka jingdon lang u ma Thombor Shiwat CEM ka JHADC, ma Evening Tron MDC JHADC, U Rev. Fr Dominic Kympat nalor kiwei ki ‘Riew Rangbah ka Thaiñ.
Ïa ka jingïalang la pynïaid da u ma Karlik Siangshai ba long ruh u Chairman ka Golden Jubilee Celebration, hashwa ban sdang la ïoh ka jingkren maitphang na u Waheh Shnong ma D.S. War, ula ïathuh haka jingshisha ka shnong Namdong-B kala kynjoh 52 snem mynta hynrei naka daw ka jinglynshop ka khlam Covid-19 ka shnong ka khlem ïoh shuh ban pynlong ha kine ki snem kiba la dep hynrei kum ka dak ka jingpyndon burom la leh noh mynta u snem 2022.
La pynsngew ruh ïaka khana lyngkot shaphang ki nongshong shnong haki phew snem kiba mynshwa katkum ka jingïa thuh jong ki riew tymmen, la ong ba haki phew snem kiba mynshwa la don kiba shong ba sah ha ki lum kiba la tip mynta ka nongrim Mukhnang, nangne ki la leit sah ha jaka kaba khot lumlakhiat bad Nongrim pam pylleiñ bad nangne kila phet bad leit sah haka u lum ba don ka parish Namdong mynta bad hangne ki laroi parum, hynrei kynsan kynsan ha u snem 1956-57 ka klam kaba jur kala wan lymshop bad ki briew kila iap haduh bakane ka shnong kala Jah syndon bad don ruh katto katne kiba lait im ki phet sha Namdong-A kaba ki khot mynta.
Kumta dei ha u snem 1964 u Woh khung Mulat uba lah khlad noh u lawan shong shnong ha une u lum uba ka Namdong-B ka don mynta, bad ha u snem 1965 bud sa ki shi kurim ka bei silbiana Thubru bad u pa Louis Myrshiang bud saki kur Dkhar kur pale bad kumta naduh u snem 1966 shaneng kiwei kiwei kila wan shong wan Shnong. Kumta dei ha u snem 1970 la ai waheh shnong noh ïaka bad khot noh ïaka kum ka shnong Namdong B.
Na ka liang u ma Sniawbhalang Dhar kum u kongsan haba ai jingkren ula ïaroh ïa ki nongpynïaid Shnong naduh kiba mynshwa haduh kiba mynta namar lada kam dei na ka jingkitkhia bad ka jingsngew long trai ïaka Shnong kamut kane ka sngi kam long kumne kumba ka long mynta, ula ong ruh ba ka Shnong Namdong-B ka dei kawei na ki Shnong kaba lah kiew bha haki ba bun ki liang, wat ki khun samla ka Shnong ki lah bun kiba la nang lah stad bad kiba shemphang, shuh shuh ula ong ba ka Namdong-B kadei ka ïit khmih jong kane ka thaiñ bad ruh kadei ka Shnong kaba don hapdeng jong kiwei pat ki Shnong kiba marjan bad ka dei ka Shnong kaba ka Sorkar ka phai khmat ban buh ïa ki Ophis treikam kiba bun jait kumba ka long mynta namar ka don ha ka jaka kaba biang bad kaba suk ïa ki paidbah ka thaiñ.
Ha kane ka sngi u ma Sniawbhalang Dhar u la plie paidbah ïa u mawnongrim sah kynmaw jong ka jingdap 50 snem ka Shnong bad la ïoh ka jingduwai kyrkhu kyrdoh na i Rev. Fr. Dominic Kympat parish priest Namdong Parish.
La pynkup burom bad ai ruh ïaka Momentoes sha ka Bei Silbiana Thubru kaba dei ka nongshong Shnong ba nyngkong ka Namdong-B hadein u woh khung Mulat uba la khlad noh.
La pynphuh pynphieng shuh shuh ïa kane ka sngi leh kmen Golden Jubilee ka Dorbar Shnong Namdong-B da ki Jingshad bad ki jingrwai na ki khun ka shnong bad ka jing ïalehkai phutbol na ki longkpa ka shnong kiba la kynjoh haka rta kaba Sanphew Snem shaneng bad la ïoh ïaka jingkren ai khublei khatduh na u Secretary shnong ma Apostol Shadap.
