Kumba ju long shisien shisnem ka jingïaid proseshon Iukharist, laitnoh tang ha kine ki arsnem ba don ka Covid-19, ïa kane ka jingïaseng Proseshon Iukharist ka Parish Jowai la pynlong hynnin ka sngi (12/12/2022) ha Madan ïalehbol ka Marianhill Higher Secondary School, ha kaba da ki hajar ngut ki parabangeit na ki 18 tylli ki Parish jong ka Jylla ñiam Jowai (Diocese Jowai) ki la ïa wan shim bynta ha kane ka jingïaseng proseshon Iukharist jong ka Parish Jowai.
Ha ka por shiphew baje porstep (10.00 AM) la don ka jingkñia Mass Iukharist kaba la lamkhmat da u Phadar Ferdinand Dkhar, Diocesan Administrator ka Jylla ñiam Jowai (Diocese Jowai) ha ka jingïasynrang ki Phadar (Lyngdoh sohblei) kiba wan na ki Parish bapher jong ka Diocese. Ïa ka Ktien jong U Blei la pynbna da u Deacon Ebormi Dkhar, la sam bad batai shuh shuh sha ki paidriewngeit da u Phadar Ferdinand Dkhar.
U Phadar Ferdinand Dkhar ha ka sneng ka kraw (Homily speech) ïa ki paidriewngeit, ula mait phang shaphang ka jingieid jong U Blei ïa ki briew bad u ong “ba U Blei U long kum ka Jar kaba tong ïa ki briew da ka jingieid ban ieid bad ban mane ïa U”. Nangta u ong ba kane ka dei ka Aiom jingpynkhreh (Advent) na ka bynta ka jingkynmaw ïa ka jingwan longbriew jong U Jisu, U khun jong U Blei sha kane ka pyrthei ban pynim ïa ki khun bynriew, kumta ka dei ka kamram jong uwei pa kawei ban pynkhreh ïalade bad ban pynmynta ïa kane ka jingwan longbriew jong U Blei sha kane ka pyrthei bad ban pdiang da ka jingkmen,ym da ka jingkmen kaba tang shipor kaba tang ha ka por Khristmas, hynrei da ka jingkmen kaba neh shilynter jingim kum U Blei, U Kynrad bad U Nongpynim jong ki.
Ha ka por nohphaisngi la pynlong ïa ka jingïaid Proseshon Iukharist kaba la sdang na Madan ïalehbol Marianhill Higher Secondary School shapoh sor Jowai da kaba ïaid lyngba ki Dong jong ka sor kata, Iawmusiang, Tpep-pale, Dulong, Iongpiah, Mission Compound bad wan phai biang bad pynkut ïa ka Iukharist proseshon ha Madan ïalehbol Marianhill. Ka proseshon ka long kaba shongkun shongblei, kaba don akor don burom ha ryngkat ki jingruwai jingïaroh ïa U Blei.
Ha shwa ban ïoh ïa ka jingkyrkhu pynwai da ka Sakrament bakhuid tam ka Duwan, la ïoh ïa ka sneng ka kraw ka kyntu ka kynpham da u Phadar Lakhontre Dkhar. U Phadar Lakhontre haba kren ha kane ka sngi, u ong bad tip shaphang U Jisu kam long mkaba suk, ka, long ba tang shu mar ïakynduh la ithuh noh ïa u, hynrei ka shim por ban ithuh bha ïa u kum U Blei bad U Nongpynim lada ym shongslem.
U Phadar Lakhontre ban batai shuh shuh ïa kane ka phang, u da shim da ka nuksa jong ki arngut ki Synran kiba mih na Jerusalem ban leit sha Emous. U Phadar Lakhontre u ong kine ki synran ki la ïa ïaid lynti ryngkat ryngkat bad u Jisu ,hynrei pat kim ithuh ba u dei U Jisu, tat ynda ki la ïashongslem bad U ki sa ithuh ba u dei U Jisu.
Kumta ruh ha ka jingim jong ki khun Khristan ki ïa kynduh ïa U Jisu ha ka Iukharist bakhuid bad haba pdiang ïa ka Iukharist bakhuid ym dei tang shu pdiang ban mihnoh shabar hynrei hap da shongbha hala ki jaka shong bad duwai bad ha kata ka jingshongslem bad duwai jong ki, hangta kin sa sngewthuh ba u Jisu U dei U Blei bad U Nongpynim jong ki.
La pynkut ïa kane ka sngi da ka jingkyrkhu da ka Sakrament bakhuid tam jong ka Duwan na kti u Phadar Ferdinand Dkhar, Diocesan Administrator ka Jylla ñiam Jowai (Diocese Jowai).
