Ka Sarot I Man kawei na ki kynhun treimon sngewbha ha ka imlang ka sahlang mynta ka sngi kaba dei ruh ka sngi leh burom ïa u Pa Togan Sangma ha ryngkat ka Jowai Civil Hospital Blood Centre kila pynlong ïa ka ‘Awareness cum Blood Donation Camp’ ha katei ka jaka kynshew snam kaba don ha Panaliar Jowai.
Ïa ka jingïalang la pynïaid da u Barlee Moore Shilla uwei na ki dkhot ka Sarot I Man, ha ka juh ka por ula pynsngew shaphang ki kam ba bha jong kane ka kynhun kaba la synñiang ha kine ki por bala dep.
La ïoh ka jingkren na u ma Kyllimot Lhuid, uba la batai ïa ka nongrim ban pynlong ïa kane ka prokram synñiang snam bad la ïoh ruh ka jingduwai nguhblei na u Sienmitre Sumer, katba ïa ki jingbatai bniah halor ka jingmyntoi na ka jingai snam la kren da ka Dr. Patricia Shylla, MO ka JCH Blood Centre.
Kum ka Doctor ba dei peit ïa kane ka jaka kynshew snam ka la pynpaw ka jingïaroh kaba khraw eh ïa baroh ki nongwan synñiang snam khamtam ïa kane ka kynhun Sarot I Man, kaba ïai bteng ïa kane ka kam ba bha kaba la kynjoh sha ka 3 (lai) sien lynter.
Kala pynsngew ruh lada khlem ki nongsynñiang snam kane ka jaka kynshew snam kam long kaba treikam. Shuh shuh kala batai bniah halor ka rukom shim snam da kaba pynlong shwa ïa ka jurip ba bniah ïa u ne ka nongai snam.
Na ka liang u kongsan jong kane ka sngi u Dr. Ebenezer War, Medical Superintendent, MCH Jowai ula ai ka jingïaroh ïa ka Sarot I Man kaba don 11 ngut hapoh kane ka kynhun, kine ki dkhot jong ka ki don shisha ïa ka jingïohi jngai bad kiba skhem ha ka jingmut jingpyrkhat ha ki kyrdan bapher bapher.
Ula pynsngew ba ïa kane ka Blood Bank la seng ïa ka naduh ka snem 2014, hashwa kane ka snem kala don ka jingdawa ba jur ban ïoh ïa kane ka jaka da kiba bun ba lang, mynta da ka jingdon jong kane ka jaka kynshew snam kala wanrah ka jingmyntoi khamtam eh ïa kitoi kiba donkam kyrkieh ïa ka snam.
“Mynshwa kiba bun hi ki long kiba sheptieng ban ai snam hynrei mynta kiba sngewthuh ïa ka jingai snam na ka bynta kiwei lyngba kine ki jaka kynshew snam, ha ka juh ka por u kitbok ïa kane ka kynhun Sarot I Man ba kan nang ïai bteng ïa ki kam ba bha da ka jingiasngewthuh jingmut lang kawei.
La pynkut ïa ka prokram da ki kyntien ai khublei na u Jait dao Sumer uba la ai khublei kyrpang ïa ki nongsynñiang snam mynta ka sngi kiba kynthup ïa u ma Oliver Shadap Passah, ma Barlee Moore Shilla, ma Kyllimot Lhuid, ma Sienmitre Sumer, ma Mariabud Paswet ha ryngkat ka jingdon lang kiwei de kiba ïadon bynta lang ha kaba ai snam ha kane ka prokram.
Hadien kane la sam ruh ïa ki Certificates sha baroh ki nongsynñiang snam (Donors) kum ka dak ban ai mynsiem bad pynshlur ïa kiwei de ban wan shakhmat na ka bynta kane ka juh ka jingthmu ba bha.
