Ka jingïalang paidbah ban pynskhem ïa ki Nongkitkam ka United Democratic Party (UDP) Youth Wing 7-Amlarem kaba la long mynta ka sngi ba ar (Teusday) kala long kaba ishongkun namar ka jingwan shakhi lang jong ki paid nongkyrshan u ma Lahkmen Rymbui ha ka jingïalang ba la pynlong ha Madan skul jong ka Amlarem.
Ïa kitei ki nongkitkam la wan pynskhem da u ma Kyrmen Shylla uba dei ruh u UDP State Youth President, ha ka jingdonlang u bah Pius Marwein MLA & Working President State Youth Wing, u ma MLA ka thaiñ, nalor ki nongkyrshan kiba hakhmat eh jong katei ka party.
Kine ki nongkitkam Party (UDP) Youth wing 7-Amlarem kiba la pynskhem mynta ka sngi ki kynthup ïa u President ma Namrhen Pohtam, Vice President ma Samuel Nongrum (War East), Aleo Nongrum (Central), Signal Lamin (War West), Manbhami Ryngkhlem (North), General Secretary ma Lambert Khonglah (Lai Lyngdoh), Asst. Secretary u Aron Pohti bad u Rihun Tariang. Organising ma Stanwos Pohkyrnu, Finance u Kyrpang Pohtam kynthup lang ïa ki Advisor, Member jong ka East, Central, West bad North.
U ma Kyrmen Shylla kum u kongsan haba kren ula ai ka jingïaroh ïa u MLA ma Lahkem Rymbui uba long shisha u briew uba trei shitom bad uba leh ïa ka jingshisha na ka bynta ki kam ba bha hapoh ka sorkar, ula ai ka jingïaroh ïa u ha kaba ïadei bad ka jingpynlong ïa ka Exam MTET na ka bynta ki nonghikai.
Shuh shuh ula ïaroh ïa ki kam pynroi kiba utei u MLA ka thaiñ War Jaiñtia ula wanrah naduh ki College, ki Govt. School, ka umbam um dih nalor kiwei kiwei de. Ula ai jingïaroh ruh halor ka jingwanrah jong u ïa ka Poilice Out post ha Barato, ula ong kam long kaba suk ban pynïoh ïa kiba bun ki skim hynrei dei ban long kiba ïaishah khnang ba kin poi ynda ula wan biang ha ka jingjop ha kane ka kynti.
Ula pynpaw ka jingsngewkmen ban ïatreilang bad u ma Lahkmen Rumbui naduh u snem 2018, bad ula kyntu ïa ki paidbah ban ai jingkyrshan ïa kane ka party riewlum ha kane ka kynti namar la tikna ba kane ka party kan sa poi ha ka bor ban ïoh synshar ïa ka sorkar hadien ka Election 2023.
La pynshong shit shuh shuh ïa kane ka sngi da ki jingrwai, ki jingshad bad ki jingtem tynrai na ki khun samla napoh ka 7-Amlarem Constituency. Kiwei de kiba ai jingkren ki kynthup ïa u ma Herman Khonglah, ma Kampher Pohlong Waheh Shnong Amlarem, ma Kolmen Pohshna Chief Adviser UDP Amlarem uba la ai ruh ki kyntien ai khublei.
