Ki khynnah pule jong ki skul bad College kiba don hapoh ka West Jaiñtia Hills District kiba la pynïasoh kum ki Scouts-Guides, Rovers-Ranger naduh ka 8 tarik haduh ka 12 tarik Nohprah ki la ïashimbynta ha ka ‘7th Winter Camp & Youth Leadership Training’ ba la pynlong ha shnong Mukhla hapoh ka jingpeit jingpynïaid ka Meghalaya Bharat Scouts & Guides, West Jaiñtia Hills.
Ïa kane ka 7th Winter Camp & Youth Leadership Training lawan ban plie pyrda da ka A.P. Syiem, District Chief Commissioner & District School Education Officer, West Jaiñtia Hills kum ka kongsan ha ryngkat ka jingïadonlang ka kong Saramai Tariang, Vice-President MBS&G, West Jaiñtia Hills kum ka symbud kongsan bad u Adiam U Bthuh, District Secretary MBS&G West Jaiñtia Hills katba u ma W. Lyngdoh, State Secretary MBS&G, State Headquarter Shillong ha ka 11 tarik Nohprah u la wan ban ïadon byntalang kum u kongsan ha ka Grand Campfire.
Ha ki san sngi jong kane ka 7th Winter Camp & Youth Leadership Training ki khynnah Scouts-Guides, Rovers bad Ranger ki la ïoh shibun ki jinghikai bad jingtip shaphang ka Scouts-Guides Movement kiba kynthup ïa ka rukom teh tyllai (Knoting & Lashing), rukom shna ïa ki jaka buhtiar buhtar (Gadget) haba don ha ki Camping, First Aid, Trekking, Whistle Signal, Estimation, Compass & Mapping bad ruh ki bynta ba ïadei bad ka Youth Leadership.
Ki Unit Leaders kiba la wan ban ïadonbynta bad ruh ban ai ki jinghikai kyrpang ha ki san sngi jong kane ka prokram ki long u Pet Dhar, u Julius Lyngdoh, u Carefully Gassah, u Teilangki Rymbai, u Sonniwel Shylla wa u Adiam U Bthuh kiba long kum ki Scouts Master bad ki Guides Captain pat dei ka Caredaline Kharbhih, ka Barisha Muthoh, ka Morinda Myrphet, ka Grecorisa Sana, ka Aidasuk Warlarpih, ka Stamlish Hinge, Ka Sngi Hadia ka Barisha Muthoh, ka Siami Shylla, Lamisakani Dkhar, ka Chwadaka D.Laloo bad ka Marjuri Thma.
Ka long kaei kaei kaba itynnad ban peit ïa ki Scouts-Guides, Rovers-Rangers ha kane ka prokram wat la ki shong ki sah ki thiah ki dem ha ki iingsherdara (tent) hapdeng ka jingkhriat jong ka tlang, da ka jingïatylli bad sngewieit kum shipara ki pyndep ïa la ki jong ki kamram ba la buh naduh dangstep haduh ban da miet.
