Ka KSU San Shnong Unit haka 15 tarik Nohprah 2022 kala ïoh ban pynkup burom ïa ki 27 ngut ki samla pule jong ki san tylli ki shnong ba kynthup Lumshyrmit, Cham Cham, Mutong, Mukhaialong bad Pynthorsale kiba pass bha ha ka eksamin bapher bapher kum ka SSLC, HSSLC bad Bachelor Degree.
Ïa kane ka programme la pynïaid da u President jong ka KSU San Shnong Unit u samla Delmon Phawa ula bynrap da kaba ong ba ka KSU kam don ka spah ka phew ban ai ïa ki samla pule hynrei ka KSU ka lah ban ai tang da ka spah mynsiem ban kyntiew ïa ka pule puthi kaba mut ïa ka momento bad ka certificate.
La ïoh ruh ka kyntien pdiang burom na u samla rangbah Pynkhreh Phawa uba dei u General Secretary jong ka KSU San Shnong Unit, kumjuh na u samla rangbah Marchy Dkhar uba dei ruh u Rangbah Shnong jong ka shnong Mutong.
U samla Rangbah Shaniahskem Dkhar uba dei ruh u Finance Secretary jong ka KSU EJHDU ula ong ruh ba ka KSU ka dei kawei ka sharak kaba tbeh lynti haka jingim jong u naduh ba u rung kum u dkhot jong ka seng la ha ka burom ka akor ne ka tip briew tip Blei. U kyntiew ruh ïa ki khun samla ba kim dei ban jaituh ha ka pule puthi ki dei ban minot thop khnang ban ïoh siew kylliang ïa ki kmie ki kpa da kaba pass bha na ki por sha ki por haduh ban da ïoh kheit ïa u soh ba thiang
Katba na ka liang u kongsan u Samla Rangbah Cherity Suja uba dei ruh u Assistant Finance Secretary jong ka KSU-EJHDU ula ong ba ka KSU ka dei kawei ka seng kaba don ki mat trei kam kumba lai tylli (Tylli, kyntiew, ka roi ka par) kawei ka mut ba dei ban ïatylli kum ki paradoh parasnam hapoh ka bri u hynñiewtrep, ba ar ka mut ban ïa kyntiew iwei ïa iwei ha ka ïoh ka kot, lane ha ka khaïi pateng haka imlang sahlang bad ba lai ka mut ba na ka jingdon jong ka Unit haki jaka bapher bapher ka roi ka par ruh kan nang kiew hapoh ka bri u hynñiew trep hynñiew skum.
Shuh shuh ula bynrap kum ki khun samla kim dei ban pynmlien ïaki jingdih pynbuaid khnang ba kin lah ban pyndep hok jar la ki kam ki jong phi ha ka pule puthi. Katba ïa ki kyntien ai khublei la ïoh na u samla Rangbah Jerimaya Dkhar uba dei u Sports Secretary ka KSU San Shnong Unit.
*************************