Ka KSU Wapung Unit ha ka 16 tarik Nohprah 2022 ka la ioh ban pynkup burom ia 27 ngut ki khun samla jong ki san tylli ki shnong ba kynthup ia ka Wapungskur, Wapung Shnong, Tuber Kmai Shnong, Tuber Shohshrieh, Mookhep kiba pass bha ha ka eksamin bapher bapher kum ka SSLC, HSSLC bad BACHELOR DEGREE, Master degree, bad ia i Wei ba lah pyndep ia ka jingpule Doctor, kaba tip kum ka 3rd U Woh Tep Kyndait Academic Award.
Ia kane ka programme la pyniaid da u Assistant Organising Secretary jong ka KSU East Jaintia Hills District Unit u Samla Shibaitlang Rymbai. Kiba Don lang ha kane ka jingsam khusnam sha ki khun samla ki long U samla Raymond Kharjana ba dei u Education Secretary ka CEC, ba long ruh u Kongsan, U Damewanhi L Rymbai uba long u symbud kongsan, u Ohibait Dkhar u ba dei u nongialam barim ka Seng bad uba ju long ruh u President ka Jaiñtia Hills District Unit, u Kwilness Suchiang uba long u General Secretary ka KSU EJHDU, u Satly Ryngkhlem u ba dei u Vice President ka KSU EJHDU, u Shaniahskhem Dkhar u ba long ruh u Finance Secretary ka KSU EJHDU, ki nongialam shnong na ka shnong Wapung Shnong bad Wapung Skur.
La ioh ruh ia ka kyntien pdiang burom na u samla rangbah Deiniwan Lyngdoh u ba dei u ruh u President jong ka KSU Wapung unit.
La ioh shuh shuh ka jingkren na u samla rangbah Ohibait Dkhar u ba dei ruh u President barim jong ka KSU Jaintia Hills Unit ha kaba u lah iathuh ka khana lyngkot shaphang u Woh Tep Kyndait ha kaba u ong ba U Woh Tep u lah ieng pyrshah ia u Syiem ka Jaiñtiapur u Amratap Sing ha kaba u la thmu ban pynkylla niam Hindu ia baroh ki khun ka Ri-lum Jaintia bad ki khun khara ki Khad-ar Dalloi. U lah bynrap shuh ba la don ka thma Nongsyntoiñ ha kaba u Syiem ka Jaiñtiapur u la phah da u Syiem khynnah u Syiem Rapo Ram Sing bad u Woh Tep u lah jop ia Kane ka thma.
La ioh shuh shuh ka jingkren na u samla Rangbah Kwilness Suchiang u ba dei ruh u General secretary jong ka KSU EJHDU.
Shuh shuh lah ioh ka jingkren na u Symbud Kongsan u Samla rangbah Damewanhi Rymbai.
La ioh ka jingkren na u Kongsan samla Rangbah Raymond Kharjana ba dei ruh u Education Secretary jong ka KSU seng kmie ha kaba u ong ba jin da U Woh Tep u ialeh pyrshah ia ka sorkar dohlieh, ka sorkar Meghalaya ka lah ithuh ia u Woh Tep Kyndait kum u Wei na ki khlaiwait ka Ri, hynrei namar ba u ialeh pyrshah ia u Syiem Jaiñtiapur ka khlem pynithuh ia u kum uwei na ki khlaiwait bad u riewkhraw ka jaidbynriew.
La ioh ka jingkren pynwai na u samla Shwari Ryngkhlem ba dei ruh u General Secretary ka KSU Wapung Unit.