Ka taïew lehkmen ba la pynlong da ka Dorbar Shnong Chilliangraij, Jowai kaba la tip kum ka’ Chilliangraij Week’ kala sdang naduh hynnin ka sngi 17 tarik u Nohprah bala wan ban plie pyrda da ma Philemon Lyngdoh, Ex-MDC, JHADC haka jingdonlang ma D.H. Pde, Waheh Shnong Chilliangraij, ki longkpa, ki longkmie bad ki khun samla jong ka Shnong.
Hashwa ban plie pyrda la pynlong ïa ka jingïalang ba la pynïaid da ka kong G. Pde, kumjuh la ïoh ka sneng ka khraw ïa ki khun samla da u Waheh Shnong ma D.H. Pde, ma Oriland Shylla, General Secretary DCC bad na u ma Lamphrang Shylla, Secretary Art & Culture Committee.
Katba na ka liang u kongsan ma Philemon Lyngdoh haba ai jingkren ula pynpaw ka jingsngewngut ïa ka Dorbar Shnong khamtam eh ïa ki nongpynïaid shnong kiba la shimkhia ban pynlong ïa kum kine ki jait prokram kiba long ki jingmyntoi ïa ki khun samla, ha ka juh ka por u ai ka jingkitbok kitrwiang ba kane ka taïew lehkmen kan long kaba ïaid beit ïaid ryntih bad kan long kaba jop.
La pynphuh pynphieng shuh shuh ïa kane ka sngi da ki jingrwai, ki jingshad ba la shim bynta na ki longkmie ki longkpa bad ki khun samla ka shnong.
La pyntip ba ïa kane ka jinglehkmen yn pynkut ha ka 31 tarik u Nohprah ha Iungwalieh shi bynta na ka jinglehkmen ïa u snem thymmai (New Year), ha kaba yn don ruh ka jingsam khusnam sha ki nongjop ha ki jingïakop bapher bapher bad kan don ruh ka jingpynkup burom ïa ki samla pule kiba wan shakhmat ha ki Examination.
