Ka Federation of Khasi Jaiñtia & Garo People (FKJGP) lyngba ka Nartiang Area Unit kala pynsah nam ïa uwei na ki riewkhraw ki longshwa kata ïa u Mar Phalangki da kaba tei syndon da u ‘Mot Sahnam’ harud surok hajan u Moopun ha ka shnong Nartiang West Jaiñtia Hills.
Ïa une u maw sahnam la wan ban plie da u bah Dundee Cliff Khongsit President Central Body, ha ryngkat ka jingdonlang ki nongïalam ka FKJGP West Jaiñtia, ki nongïalam shnong bad ki riew paidbah.
“Ïa ka rukom oh dur oh dar nadong shadong la leh da u ma Kirot Mukhim uba dei na ka shnong Padu Amlarem Sub-Division, na ka bynta ki jinglut jingsep baroh la bei da ka seng FKJGP.
Hashwa ban plie ïa utei u mot sah nam la don ka jingïalang ha Madan Poh Rynïaw (Dong Bisari) jong ka shnong Nartiang, ha kaba la ïoh ruh ka jingkren pdiang da u ma Bin Raliang, ka jingkren na u Waheh Shnong Nartiang ma Mum Phalangki bad kumjuh na u ma Repleaseme Phalangki uba la pynsngew shaphang ka jingïathuh khana lyngkot jong u Mar Phalangki.
Da kaba pynsngew ruh ba kane ka sngi ka dei ka jingsah jingkymmaw jong u Mar Phalangki, ula pynsngew ba ha ka jingshisha ïa une u mot la thmu ban tei ha ka jaka ba don ki Mawbynna, hynrei namar ka ki daw ban lah kiar la shna noh ha kane ka jaka hajan u Moopun.
Ula ong naduh ka snem 15 spah la seng ïa kitei ki mawbynna ha Nartiang dei u Mar Phalang ba la wanrah ïa ki na ki jaka kum na Raliang, ula pynsngew ruh ba u Mar Phalangki um dei uta u riewïaleh tham hynrei u long uta u briew uba khlaiñ ha ka bor met naduh ka kit ka bah bad uba don ruh ïa akor ka burom ha ka ñiam ka rukom.
Kiba bun na ki nongkren kila ai ka jingïaroh ïa ka FKJGP ha ryngkat ka shnong kiba la shim ka jingkitkhlieh ban pynneh pynsah ïa ka Riti Dustur jong ki long shwa manshwa, la ai jingmut kala dei ka por ban pynmih noh ïa ka kot kaba ïadei bad ka jingïathuh khana shaphang u Mar Phalangki khnang ba ki khynnah skul kin ïoh ban pule ha ki skul.
La pynphuh pynphieng ïa kane ka sngi da ki jingshad tynrai da ki khun samla ka shnong bad na ka liang ka FKJGP kala sam ruh da ki nep syiad ïa ki riew tymmen jong ka shnong kiba la kynjoh sha ka 75 snem shaneng ka rta.
