U President Rangbah ka Federation of Khasi Jaiñtia & Garo People (FKJGP) u bah Dundee Cliff Khongsit mynta ka sngi ula wan ban pynskhem ïa ki nongkitkam ba thymmai jong ka FKJGP West Jaiñtia Hills District ha ka jingïalang kaba la long ha madan Poh Rynïaw (Dong Bisari) jong ka shnong Nartiang.
Kine ki nongïalam ba thymmai ka FKJGP West Jaiñtia Hills ki kynthup ïa u President u Damian. S. War, Vice President u Wompher, General Secretary u Marhok K. Marboh, Assistant General Secretary u Nongkhraw Rani, Chief Organising Secretary u Shlur Mukhim, Oganising Secretary u Embhah Passah bad u Phrangki Kyndait, u Information Secretary u Kynsai M. Khonglah, Education Secretary u Melamlynti Sumer, Sports Secretary u Bin Raliang, Disciplinary Secretary u Nabait Ymbon, Socio & Cultural Secretary u Riyoo Pulang, Agriculture Secretary u Banteilang Mynsong lem ba ki 5 ngut ki Executive Member.
Ha kane ka juh ka sngi la pynskhem ruh ïa ki nongkitkam thymmai jong ka Nartiang Area Unit. Na ka liang u bah Dundee Cliff Khongsit haba ai jingkren ula pynsngew naduh mynshwa ïa ki nongïalam ka Nartiang Area Unit da kaba ong “ba ki kam jong phi ki sa kren kham jam” bad u kyrmen ba ka seng kan sa ïoh ka jingkyrshan shuh shuh na ki paidbah ha kiba bun ki liang.
Ula pynsngew kum ka seng kala hap ban pynsngew ïa ki jingeh sha ka sorkar da kaba pynlong ki jingïaid rally bad kiwei de, ula ong ruh ba ki don da ki hajar tylli ki kam basah kut na ka bynta ki khun samla hynrei ka sorkar ka la shu set khlem jingpynbna, wat ki post Nursing ha NEIGRIHMS la hap ban ïakhun sha Guwahati bad kumjuh ïa kiwei de ki kam la hap wanrah beit na ki briew na shabar, halor kane ula ong ka por kala donkam ban don ka State Employment Policy.
U la kynthoh jur halor ka jingbym lah ka sorkar ban tehlakam ïa ka jingkiew dor jong ki bai Hospital na ka bynta kito kiba thiah pang, na ka por sha ka por ka seng kala ïoh jingujor halor ka jingïapher ka dor na kawei ka Hospital sha kawei pat. Shuh shuh u ong lada peit ha ka liang ka pule puthi ruh dei tang kiba don ha ka bor bad kiba don ba em kin ïoh ban leit pule ha ki lait ba kham shalor.
Ula pynsngew ruh ba ki seng Bhalang kin long kita ki 3rd Party ban dawa ïa ka hok jong ki paidbah namar ka jingbymler jong ka sorkar ba shynshar kaba long ka 1st Party bad ki liang pyrshah (Opposition) kum ki 2nd Party.
