U myntri ba dei peit ïa ka kam pohïing jong ka sorkar jylla bad kiwei de u ma Lahkmen Rymbui mynta ka sngi ula wan ban plie ïa u maw nongrim ban pynkiew kyrdan noh ïa ka Jaraiñ PHC sha ka Sub Divisional Hospital.
Ka jingpynkiew kyrdan ïa kane ka jaka sumar kan ïarap shibun ïa ki nongshong shnong ka thaiñ Amlarem Subdivision, khamtam eh ïa ki longkmie ban kha khun, kane ka Hospital kan don haduh 50 tylli ki jingthiah, ka jaka kynshew snam, X-ray, ki Doctor Specialist, bad ki nongtrei katkum ka jingdonkam jong ka Hospital.
Na ka liang u ma Lahkmen haba ai jingkren ula ong ba kane ka Hospital ka long kaba nyngkong eh hapoh ka District bad kan long ka jingmyntoi kaba khraw eh ïa ki nongshong shnong ka Amlarem Sub-Division kum ki shnong ba marjan ka Demthring, Mustem, Ïongnoh bad kiwei de ha kaba kim donkam shuh ban leit shaduh Civil Hospital Ïalong.
Shuh shuh ka jingdon jong kane ka jaka sumar ba 50 jingthiah ha ka Shnong Jarain kaba dei ruh ka jaka ba long pdeng bad kan ai ruh ka jingshakri kaba bha tam ïa ki paidbah u kyrmen ïa ka tender ban pyntreikam kan sa mih ha kane hi ka taïew.
Ha ka juh ka por u ong ba ka jylla Meghalaya ka long kawei na ki jylla ba kiew bha ha ka liang ka rukom ai jingsumar hapoh ka ri.
Ïa ka jingïalang la pynïaid da u DM&HO ka West Jaiñtia Hills District u Dr. K.C. Ajar, ha ka jingdonlang u Ramkumar. S, IAS Mission Director ka jylla, ka BDO Amlarem kong Y.R. Mawlong, MCS, ki nongïalam shnong, ki nongtrei ka Hospital bad kiwei de.
