Ka Seiñraij Jowai ha ryngkat ka Seiñraij Mynso kila pyntip sha baroh ki khun ka bri u Hynñiawtrep Hynñiewskum ba ka ‘Dorbar Ñiamtre’ kaba 17 jong ki khun ka Ri 30 Syiem 12 Dolloi kan long ha ka 24 tarik bad 25 tarik u Nohprah, 2022 ha madan Lumiariang, Mynso, Laskeiñ Block- West Jaiñtia Hills.
Ha kine ki ar sngi ka Dorbar Ñiamtre kan don ka prokram kyrpang kaba ïadei bad ka ñiam rukom, dustur riti, ha kaba naduh ka sngi nyngkong ki Waheh Wasian jong ka Seiñraij Mynso bad ka Seinraij Jowai kin batai shapang ki nongrim ka ñiam ka rukom jong ki manshwa bad ki kyntien sneng kyntien khraw ïa ki khun samla kiba long ka lawei.
Katba ha ka sngi kaba bud 25 tarik Nohprah kan don ka jingkren na ki Waheh Wasian halor ki phang kiba ïadei bad ka jinglong kyrpang ka jaitbynriew hynñiewtrep hynñiewskum ha ryngkat ka shad ka rwai kiba yn ïashim bynta da ki Raij jong ki shnong bapher bapher.
Halor kane ka Seiñraij Jowai bad ka Seiñraij Mynso ki khot sniawbha ïa baroh ki khun ñiamtre na kylleng ki Shnong, ki Raij jong ka bri u Hynñiewtrep Hynñiewkum ban ïawan sakhi lang sha katei ka Dorbar Ñiamtre.
