Ka State Council of Science, Technology and Environment (SCSTE), Meghalaya kum shi bynta na ka jingrakhe ia ka National Mathematics Day Celebration 2022 kala ioh ban pynlong ia ka prokram ba shi sngi halor ka ‘National Mathematics day cum Orientation programme for Resource Persons (Math Ambassadors) of the Crash Tuitions programme for SSLC candidates 2023’.
Ia kane ka prokram la pynlong ha Shillong College Auditorium hynnin ka sngi (22/12/2022). Ha kane ka prokram la wan ban iashim bynta 80 ngut kiba dei ki Maths Ambassadors jong ka Jylla ki ban sa long ki nongiarap ia ka Council na ka bynta ban ai jinghikai sha ki samla ban iakhun ia ka eksam SSLC ha ki 130 tylli ki Centre ha kylleng ki bynta jong ka Jylla. Kine ki centre ki kynthup 80 tylli ha Khasi bad Jaintia Hills bad 50 tylli ha Garo Hills.
Ha kane ka sngi la wan ban ai jinghikai da u bah Spainborlang Kharshandi uba dei u Associate Professor ka Mathematics jong ka Shillong College.
Kum ban shu pynkynmaw ba ka sorkar India kala niew ia ka 22 tarik u December kum ka National Mathematics Day. Ia kane la pynbna da u Prime Minister barim u Dr. Manmohan Singh ha ka 26/02/2012 ha Madras University kum ka dak jong ka jingrakhe ia ka lyngkhuh sngikha ba 125 snem jong u stad jingkheiñ ka India u Srinavasa Ramanujan (22 December 1887-26 April 1920). La pynkynmaw ba kane kam dei eh tang ka jinglehburom ia utei u riew stad jingkheiñ, hynrei ka long ruh kum ka jingpynshlur ia ki khun samla jong ka ri ba kin shim ia ka jingkheiñ kum kawei na ki lad kiba lah ban pyndonkam ha ka imlang ka sahlang.
