Ka Rumshnong Youth Club Bataw kaba la seng naduh u snem 1967 kala jam shakhmat ban pynshlur ia ki kam ialehkai phubol hapoh ka shnong Bataw bad kumjuh hapoh ka thaiñ hi baroh kawei da kaba ka la ioh ban sdang ruh ia ka 1st RYC Bataw Knock Out Football Tournament, da kaba sdang ia ka jingialehkai ha kane ka sngi Nyngkong hapdeng ka Ten Star FC Bataw pyrshah ia ka UYSSC Umlyngsha.
Ia kane ka Tournament la wan ban plie pyrda da u ma Shaniahskhem Dkhar kum u kongsan ha ka jaka jong u ma Bison Shylla ha ka jingdon ryngkat u ma Bhalang Suchiang Ex-Waheh Shnong ka Shnong Bataw.
U ma Shaniahskhem Dkhar haba ai jingkren ula iaroh ia ka Club kaba la shim ia kane ka sien jam ka ban pynshlur ia ki khun samla jong ka shnong bad kumjuh ula kyntu ia ki khun ba kin long kiba shimkhia ban kyntiew ia ka bha ka miat hapoh ki shnong ki thaw. Ula ban jur ia ki samla ba kim dei ban shah ialam bakla, u ong ba kum ki samla ki dei ban sngewthuh ia ki jingdawa ba kongsan kiba kum ka jaitbynriew ka donkam, kila dei ban mih shakhmat ban dawa ia ki aiñ kiba khlaiñ kum ka ILP ka ban long kum ka stieh ia ka jait bynriew ha ki pateng ban wan.
Haba phai sha ka jingialehkai ka la long shisha kaba itynnad bha, ha kaba ia ka jar la ioh ban pynkhih nyngkong da ka Ten Star FC lyngba u Deibor Suchiang ha ka minit kaba 33. Hadien jong ka kylla step u Seibor Suchiang ula ioh ban pynkhih ia ka jar ha ka minit kaba 57.
Da ka jingiakhun ba tyngeh ka UYSSC Umlyngsha kala ioh ban pynkhih jar lyngba u Namphrangmi Talang ha ka minit kaba 61. Hynrei na ka liang jong ka Ten Star FC kala ioh ban pynkhih jar lyngba u Seibor Suchiang ha ka minit kaba 78. Kumta lyngba kine ki kol ka Ten Star FC kala lah ban pynliem ia ka UYSSC Umlyngsha da 3-1 kol.
Ka prais jong kane ka Tournament ka long T.50,000/- ia ka kynhun kaba jop bad T.30,000/- ia ka kynhun kaba wan ba ar. Baroh ki kynhun (Teams) kiba la wan iashim bynta ha kane ka Tournament ki don 16 tylli.
Kane ka long katkum ka kyrwoh khubor bala phah da u ma Deihok Sumer President jong ka Club.