U MLA ka thiañ uba dei u myntri ka sorkar jylla ba peit ia ka kam pohïing bad kiwei de ha une u bnai ba la dep ula plie paibah ïa ka Nohkawang Water Fall, kaba don ha ka shnong Satpator, Trangblang West Jaiñtia Hills District.
Ha katei ka sngi la ïadonlang da u ma Supporter Pohkyrnu uba pyniaid ia ka jingialang ryngkat u Ex MDC ma Lamdibok Sumer, ma Daman Lakashiang (Dolloi Elaka Satpator), ma Kolmen Pohshna Adviser Elaka Satpator bad kiwei kiwei ki riew rangbah kiba la ïa donlang ryngkat ha kane ka sngi kiba la pyllait por khnang ban ïa wan sha kane ka jingplie ïa kane ka Nohkawang Water Fall.
Na ka liang u Waheh Shnong Trangblang ula ai ka jingkitbok kit rwiang ïa ki nongpynïaid jong kane ka Nohkawang Water Fall kiba la don jingmut ban pynroi pynpar ïa ka dong ka shnat, ula ïathuh kum ka shnong ka don ka jingthrang ban ïatreilang bad ka Elaka hi baroh kawei.
La ïoh ruh ban kren da u Lamdibok Sumer da kaba ula ïaroh ïa u Nongsdang jong kane ka Nohkawang Water Fall u ma Rajip Lyngdoh uba dei u kñi jong ka kur Lyngdoh ba ki la lah ban pyntrei ïa kane ka Water Fall kat haduh ba la kham suk ka ïaid kjat sha kane ka jaka bad u la ong ba ha ka jingïaid lynti bunsien hi lah ban ïa kynduh bun ki jingeh khamtam ha ka jingsdang ïa ka kam hynrei da ka jingtrei shitom kila lah ban pynurlong ïa kane ka kshaid ka ba lah ban khring ïa ki paitbah bad u la bynrap ruh ba ka Scheme jong ka Tourism ka don bun ki bynta ban ïarap ïa kiba don ka jingmut ban pyntreikam ïa ka kam jngohkai pyrthei.
U Dolloi Elaka Satpator ma Daman Lakashiang u ai ka jingkitbok kit rwiang ïa ka Kur Lyngdoh ba la ïalam da u Rajip Lyngdoh ba wat la kane ka Kshaid ka dang long kum ka jong personal ba la pynlut pynsep da ka kur lyngdoh, hynrei kyrmen skhem ba kum ka jingkwah jong ki, ka Sorkar kan plie ki lad ki lynti ia ka kur Lyngdoh lyngba ki Scheme jong ka Tourism kan nang lah ban pynitynnad shuh shuh ïa kane ka Nohkawang Water Fall, Satpator, Trangblang.
La ïoh ban kren khadduh da u ma Lahkmen Rymbui Local MLA 7 Amlarem-Constituency uba long ruh u Chief Guest ha kane ka sngi Plie ïa ka Kshaid Nohkawang da kaba u la ïaroh ïa u Nongïalam jong ka kur ma Rajip Lyngdoh ba ula trei shitom lyngba ka Khlaw Kur Lyngdoh kiba dei ki Zamindar jong kane ka Khlaw ba don kane ka kshaid. Ula ong ruh ba U Blei u ai ka mariang kaba itynnad bha ha baroh ki jaka bad ka shong pat ha ka jingpynïaid bad pyndonkam jong ki briew kumno ban pyntrei kam ïa ka.
Ha ka jingkren jong u MLA u la ong ruh ha kine ki 5 lane 10 tylli ki snem ba kaei kaba u sngewkmen eh ka long ba ki paitbah mynta ki sngi ki paitbah ki ithuh ba kumno ban pynkiew ïa ka kam jngohkai pyrthei, hynrei ha ka thaiñ War Jaiñtia pat ka long kaba shem jingeh pat ka long, wat la ki dei ki jaka kiba itynnad ruh hynrei ki dei pat ki jaka jong ki kur, ki Zamindar bad ki jong riewshimet, kumta ka long kaba shem jingeh ïa ka Tourism ba kan pyntreikam kat kum ka jingkwah jong ka.
Ula ong ruh ba naka liang ka Elaka Satpator kala don ïa kane ka Kshaid Nohkawang bad ka Krem Pubon ha syndai ka Beach ha Pasadwar bad u la ong ruh barabor ki Zamindar ki dei ban ïa kynduh bad ka sorkar, khnang ba kin tip kumno ban pyntreikam ïa kane ka Tourism, namar ba kat kumba la ïohi ha kine ki snem ba la dep ka Sorkar kala dep ban sanction ha bun ki jaka ha War Jaiñtia hynrei don ki jingïashem jingeh hala ki jong ki jong ki bynta kiba khang ban pyndep ïa kine ki kam jngoh kai pyrthei, namar don ki jaka ba ym lah ban pynshna bad don ruh ki jaka ba ki ïadon ar liang mamla.
Kumta barabor ki Zamindar ki dei ban ïa kynduh bad ka Department Tourism. U la ong ruh ba ka ba kongsan eh ka dei ka jingpyniasoh lyngba ki surok na kawei ka shnong sha kawei pat namar ban ïeng marwei (Stand alone) ym lah ban pynurlong.
Ka surok kaba donkam bha ka dei ka surok na Trangblang sha Amlanai bad sha Pasadwar khnang ba kan pynsuk ïa ki pait nongleit nongwan. Kane kan long tang lada ki Zamindar ki trai jaka ki ïadon kawei ka jingmut. Ula ong ruh ka Tourism kam dei ka ban im jakpoh tang uwei ar hynrei ïa baroh lang kiba don ha kine ki thaiñ ba don ki park lane kshaid. Ula bynrap ruh ba ka Tourism ka don bun ki project ki Scheme ha ka Department jong ka bad ka shong pat ha ki trai jaka ban leh.