Synniang jingiarap pisa ba 2 lak tyngka kum ka bai seng
Ka Dorbar Shnong Namdong-A ka ai khublei kitbok kitrwiang ia u samla Dawan Lyngdoh MDC bad u ba long ruh u kyrtong ban ia khun ia ka election MLA na ka 1-Nartiang Constituency na ka party United Democratic Party UDP ba un ioh ia ka jingjop kum u MLA.
Ka Dorbar Shnong kaba la long ha ka 3/1/2023 ha madan football Namdong-A u samla Dawan Lyngdoh u la kyrpad bad pan jingkyrshan na ki paidbah nongshong Shnong ban ai jingkyrshan ia u da ka mon laitluid ym da ka jingpynbor iano iano naduh ki nongshong Shnong bad ki paidbah ka constituency hi baroh kawei.
“Ngin long kiba laitluid ban jied iano ngi mon hynrei kum ki para nongshong Shnong ngin ia burom mar kylliang khnang ban lait na ki jingkulmar ha ka Shnong ka thaw namar nga ia khun election ym ban ia shun ne don daw bad no bad no hynrei da ka jingthrang ban pynbha bad wanrah ia ka roi ka par ha ka imlang sahlang, bad na ka bynta jong phi ki paidbah ruh nga kyrpad ban ia burom kylliang lada ngi kyrshan iano iano ruh khnang ban neh ka shong suk shong sain namar ka election satang ar bnai ka la kut hynrei nga bad phi ngi ia imlang ha ka juh ka Shnong katba ngi dang im. kumta Lada phim lah ban kyrshan ia nga ruh ngim dei ban ia buh nud iano iano” la ong u ma Dawan.
Na ka liang u Bah Arki Sumer, Waheh Shnong Namdong-A ruh u la buh ka jingkyrpad lang ia ki paidbah nongshong Shnong ban ai jingkyrshan lang ia u samla Dawan Lyngdoh kum u briew uba la pyni shibun ki kam babha ha ka Shnong ka thaw bad ha ka imlang shalang u long u briew uba ia kit ia bah lang ia kano kano ka jingeh ba ka shnong ka ia kynduh.
Hadien kane ka jingpynsngew na u samla Dawan Lyngdoh bad na u Waheh Shnong na ka liang ki paidbah nongshong Shnong ki la rai ban synniang sha u Bah Dawan Lyngdoh da ka song pisa kaba 2 lak tyngka na ka Shnong kum ka dak ka jingkitbok kitrwiang ia u khnang ba un ioh ia ka thong ka jingjop bad ban long kum u MLA jong ki.
Kane ka long katkum ka khubor ba la phah da u S. Thubru, Secretary Shnong Namdong A.