Mynta ka sngi ka Sein Kur Shylla Khasi Jaiñtia, kala ioh ban pynlong ia ka Dorbar Pyllun kaba saw ka jong ka ha ka Shnong Byndihati East Jaintia Hills District, ha kaba ha kane ka Dorbar la wan poi da ki hajar ngut ki dkhot ka Kur kiba na Ri Lum Khasi Jaintia kumjuh ruh kiba shong ba sah shapoh ka jylla Assam (Silchar).
U kongsan jong kane ka Dorbar Kur Shylla u dei u ma Kyrmen Shylla uba dei u MLA ka thaiñ uba long ruh u myntri ka sorkar Jylla. Ha kane ka sngi la iadonlang u Waheh Shnong ka Byndihati, nangta i kong Santa Mary Shylla, ki Father, ki Pastor, Lyngdoh, DM&HO Khliehriat Dr. Domanic Shylla, BDO Wapung C&RD Block Dr. Tammiyaki Shylla bad kiwei de.
Ia kane jingialang mynta ka sngi la pyniaid da u President Rangbah ka Kur u ma Pyrkhat Shylla, haba la pynher ruh ia ka lama jong ka kur ha shwa ban sdang ka jingialang. Kala don ka Financial Reports & Annual Report ba la ai da u General Secretary ka Kur u ma Eastenius Shylla.
Na ka liang jong u Kongsan ula pyllait paidbah ia ka Calendar jong ka Kur. Hadien kane kla pynithuh bad pynskhem ia ka seng samla ka Kur, la ioh ruh ia ki jingkren da ki nongmihkhmat na ki District jong ka West Jaintia Hills, South West Khasi, East Khasi District.
U ma Kyrmen haba kren u la ong kumno ban kyntiew ia ka burom jong ka kur ka dei tang ka ktien ka thylliej kaba don akor bad ka jingsneng jingkraw kaba lah ban kyntiew ia ka nam bad burom jong ka kur. Na ka liang u ma Kyrmen ula kyntu ruh ia ki khun samla ka kur ba kim dei ban long kiba sarong ne sngewmeng khamtam eh ha kaba ibein ia ki riew rangbah hynrei ki dei ban long kiba shlur na ka bynta ki kam ba bha.
Shuh shuh u la ong ba lada don kano kano ka jingeh jong ka kur un don ryngkat bad kum u nong mihkhmat un iarap kat kaba kot ka bor na ka bynta ka jingdonkam jong ka kur, u la ong u dap da ka jingsngewsarong ba haduh mynta ka kur kam pat juh shah kynthoh ne kynnoh, lait tang uta uwei ar kata ka bym lah ban lait.
Ha kane ka sngi ka Sein Kur Shylla Khasi Jaiñtia kala pynkup burom ruh ia u samla Edigio Paia Shylla uba la poi haka kyrdan 16th Position ha ka Eksam SSLC jong u snem 2022.
La pynphuh pynphieng shuh shuh ia kane ka sngi da ki jingshad jingrwai kiba la shim bynta da ki dkhot ka Kur jong ka East Jaintia, Shad tynrai na ki dkhot ka kur na West Jaintia, Shad Pastieh na ka Shnong Byndihati. Haba kut jong ka jingialang u kongsan u ma Kyrmen u la pynhiar ia ka lama jong ka Sein Kur Shylla Khasi Jaiñtia.
