Mynta ka sngi u District Election Officer ka West Jaintia Hills District u bah B.S. Sohliya, IAS ula khot ia ka jingialang jong ki nongialam jong ki seng Saiñ Hima Sima kiba kynthup ia ka BJP, AITMC, NPP bad kiwei na ka bynta ban aiti ia ki Final Electoral Rolls sha ki.
Mynta ka sngi la ioh ban sam ne aiti ia kine ki Electoral Rolls sha ki nongialam Party jong ka 1-Nartiang, 2-Jowai, 3-Raliang bad ka 4-Mowkaiaw, ha ka jingdonryngkat u Additional Deputy Commissioner u PK Boro, u ma M.A. Challam, kong DD Syngai, kong B. Blah bad bah W.K. Kharbuli EAC.
Haba kren sha ki nongialam u bah B.S. Sohliya, District Election Officer ula khot ia ka jingiatreilang jong ki seng saiñ hima sima baroh khnang ban ioh ia ka elekshon kaba khuid ba suba bad lait na kino kino ki kynrum kynram.
La ioh ruh ka jingbatai pynshai shaphang ka Model Code of Conduct lyngba u ma M.A Challam, Addl. DC.
Katkum kane ka Final Electoral Roll jong ki Constituency hapoh West Jaintia Hills District ki nongthep vote ki don 2,00,602 ngut. Na kine 97,102 ngut ki dei ki shynrang bad 1,03,500 ngut ki dei ki kynthei.
