La khang ia ka jingdro ha ki kynroh, ki jingialang bad jingiaid paidbah dei ban ioh bor shwa na ka ophis DC
Namar ka jingtreikam jong ka model code of conduct na ka daw jong ka Assembly election, kumta u District Magistrate ka West Jaiñtia Hills ha ka jingpynmih hukum katkum ka kyndon 144 CrPC la khang ia kino kino ki riew shimet ne ki kynhun ban rah pisa halade haduh Rs.50,000/- (Sanphew hajar) tyngka hapoh ka District.
Kane ka hukum kan treikam naduh ba la pynmih ia ka bad kan bteng haduh ban da dep ka election.
Ha kawei pat ka hukum u District Magistrate ka West Jaiñtia Hills ula pynmih ba la khang ban dro ne thoh dak ha ki kynroh rud surok ne ha ki kynroh jong ki riew shimet, namar bunsien kane ka wanrah ka jingujor na ka liang jong ki trai kynroh bad ka wanrah ka jingbym iasngewthuh jingmut hapdeng ki para nongshong shnong.
Ia ka jingwah ia ki banar ba heh ne barit yn shah tang lada ioh bor shwa na ki trai ïing ryngkat ka jingaibor na ka ophis jong u Deputy Commissioner.
Yn ym shah ban pynlong kino kino ki jingialang paidbah khlem da iohbor na ka ophis jong u DC bad ruh na u Waheh Shnong jong kato ka jaka ba thmu ban pynlong jingialang paidbah. La khang ruh ban pynsawa ia ki kor sawa (PA System) hapdeng ka por 10:00 PM haduh 6:00 AM.
Ym shah ruh ban pynlong ia ki rali ne ki jingiaid proseshon khlem ka jingiohbor na ka ophis jong u Deputy Commissioner.