Ka JSU Moodymmai Unit hapoh ka jingialam u President u samla Nevercare Passah bad u General Secretary ka seng u samla Emitre Pariat ki la ai da ka jingthoh sha u DC ka West Jaintia Hills ban khmih lem halor ka jingeh ki khynnah pule halor ban pynhiar ia ka bai kali kamai ia ki khynnah pule hapoh ri lum Jaintia. Ka seng hadien ba ka lah ioh ia ka jingujor bad ka jingud na kiba bun ki khynnah pule ka lah shim ia ka rai ban kynduh hi ia u DC bad la ai da ka jingthoh ba dei ban iarap ban pynhiar ia ka bai kali ia ki khynnah pule namar bun ki khynnah pule na ki shnong bapher bapher ki dei kiba wan na ka long ing baduk bad ki shem jynjar ban siew ia ka bai kali ban leit sha skul bad kolej kum ba shim dor bai kali ia ki riew paitbah.
Ki nongialam ka JSU Moodymmai Unit ki lah dep pynsngew mar khmat bad u DC ka West Jaintia Hills mynne ka sngi halor ka jingeh ki khynnah pule bad na ka liang u DC u lah kular ban shim khia ia kane ka jingkyrpad ka seng bad u DC lah kular ban iakren lang ia kane ka jingkyrpad ka seng ryngkat bad u DTO ka West Jaintia Hills.