Ka JSU ha ka jingialam u General Secretary ka JSU Shillong Circle u Request Pakma ryngkat u Eddy Kerry Pohtam uba long u President ka JSU War Jaintia ki lah leit ban kynduh ia u Executive Engineer ka Jowai Central Division halor ka jingnsniew palat u surok National Highway 44 & NH-40 (Extension) kaba ktah ia ka iaid ka ieng u paitbah khamtam ia kito kiba pang kiba shitom kiba wanrah ia ka jingeh ia u paid ka ri lum Jaintia.
Ka JSU ka dap da ka jingsngewlyngngoh halor ka jingthet kti jong ka PWD Jowai Central Division ban maramot ia une u surok ,namar ba u Executive Engineer u lah ong ba na ka ka liang jong ka NHIDCL kan khot tender shen na ka bynta ban maramot ia une u surok. Ha ka jingkylli ka ba lah kylli da u Request Pakma ba lah don ne em ka jingsoi ne ban aiti noh ia une u surok ban maramot sha ka NHIDCL, hynrei kaba sngewlyngngoh shuh shuh ba u Engineer u lah ong ba kam don kano kano ban aiti sha NHIDCL ban shimti ia une u surok.
Na ka liang jong u Executive Engineer u lah ong ba ka la don ka jingleit jurip teng jong ka NHIDCL khlem ka jingtip jong ka tnad PWD, u lah ong ruh ba ka sorkar na Delhi kam ai shuh ia ka bhah na ka bynta ban maramot ia une u surok, hynrei u lah ong ba ki ioh tang ia ki Minor Repairing na ka bynta une u surok.
Na ka liang ka JSU ka kwah ban buh jingkylli ia ka PWD shano ka jah kata ka Minor Repairing jong ka PWD Jowai Central Division ha kaba u paitbah u hap ban iaid ha ka lynti kum ha ki por ba shong kali kulai uba rim. Te kumta na ka liang ka JSU ka phah khubor sha ki 7 ngut ki MLA ka ri lum Jaintia aiu ki lah leh na ka bynta ka jingeh u paitbah halor une u surok, ha kaba ki iaid lynti nangne u surok man ka por kumno kim iohsngew ia ka jingsniew une u surok ne kin pynkylla pynban ia une u surok kum ka mat jong ki ha ka por elekshon.
Ka seng ka buh jingkylli ia kine 7 ngut ki MLA haba ki wan na sor shillong ba leit sha ki constituency ialade ki leit da ka kali ne da ka liengsuin ba kim iohi shuh halor ka jingnsniew palat une u surok. Te kumta na ka liang ka seng ka kyrpad ia ka sorkar jylla bad ka sorkar kmie ba dei ban maramot mardor ia une u surok NH-44 ba kan nym ktah ia ka iaid ka ieng jong u patibah ka ri lum Jaintia.
