Kum ka dak ka jingrakhe ia ka sngikha jong u kpa ka jait bynriew ne u Father of Nation u Mahatma Gandhi, mynta ka sngi 02.10.2021, ka District Adiministration jong West Jaintia Hills District, ryngkat ka jingiatreilang bad ka Jowai Municipal Board (JMB), ka Dorbar Shnong Tymmpang Iawmusiang Jowai, ha jingiasnoh ktilang baroh ki Waheh Shnong ki shnong ka Nongbah Jowai, ki Market Committee, kila pynlong ia ka Cleaning Drive ha ki bynta jong ka Iawmusiang Jowai kumjuh ki Dorbar shnong bapher bapher kila iashim bynta ha kane ka jingpynkhuid.
Mynta ka step ha shwa ban sang ka jingpynkhuid la don ka jingialang kaba lyngkot ha jan ka ophis u Deputy Commissioner WJHD, ha kaba ia ka jingialang la pyniaid da u ma Eddy Shylla Waheh Shnong ka Tympang Iawmusiang, la ioh ia ka jingkren na u ma M. A. Challam MCS Extra Assistant Commissioner, WJHD, na u President ka Synjuk ki Rangbah Shnong Jowai Urban, ma Alan Niangti, ma Alexander S. Mukhim, MCS Additional Deputy Commissioner, ma A. Sumer, Secretary Sein Raij Jowi, na ki Nongmihkhmat ka Market Committee Jowai, na ka liang ka ophis u DC bad la ioh ia ka jingkren na u, haka jingiadon lang kiwei de ki heh sorkar bad ki nongialam shong bapher bapher.
U ma Challam ha ba kren u la ong ba ka jingpynkhuid ia ka iew ne ia ki shnong ki thaw bad ki dong ki shnat ym dei tang mynta ka sngi, hynrei ka dei ia uwei pa kawei ban don ka jingkit khlieh ha lade shimet ka jingpynkhuid ne lehkhuid ka dei ban long man la ka sngi bad ka jingiatylli lang ka long kaba donkam eh ha ka jingiadei bad ka jingpynneh pynsah ia ka khuid ka suba ha ki iew ki hat, ki shnong ki thaw bad kiwei de ki jaka.
Na ka liang u ma Arwotki Sumer, u la ong ba um kwah ba kane ka jingpynkhuid iew ne pynkhuid shnong ka kut tang mynta ka sngi hynrei ai ba kane ka jingkhuid kan iaineh iaisah pateng la pateng hapoh kane ka nongbah Jowai bad ha ka District hi baroh. U ma Sumer u la ong ruh ka jingjakhlia nyngkong ki shnong ki thaw ka wanrah ka jinglehraiñ bad kaba ar kaba long ruh kaba ma ka wanrah ia ki jingpang jingshitom ba har rukom.
U ma Mukhim ADC, u la ong ba ha iing ha sem ngi leh khuid lehsuba da sneng ia ki khin ki kti ban lehkhuid, hynrei balei pat haba ngi mih sha surok ne lynti syngkieng ngi bret pathar ia ki plastik ne ia ki kynja jingdong jingbam ne tah shun bad biah ne bynthiew kat sha ba lap, na ka liang u, u kyntu ia baroh ba kumba ngi leh khuid ha iing ha sem shabar ne sha ki lynti ki syngkieng ngi dei ban leh kumjuh.
Na ka liang u Waheh Shnong ka Iawamusiang Tympang u ma Shylla haba kren u la ai khublei kyrpang ia ka bor District jong ka West Jaintia Hills District, ia ka JMB, ki Market Committee, PHE, Police bad kiwei kiba la iadon bynta lang bad kiba la wan ban iasnoh kti lang sha lane ka jing pynkhuid ia Iawmusiang Jowai.
