Kum shi bynta ban pynkhlaiñ ia ka jingpoi jong ki nongthep vote sha ki ar tylli ki jingjied nongmihkhmat kata sha ki Assembly Election ki ban sa long shen ha kine ki khyndiat sngi bad ka Lok Sabha Election ka ban sa long ha u snem ban wan ka Election Commission of India (ECI) ryngkat bad ka Subhash Ghai Foundation kila thaw ka wei ka jingrwai kaba ai kyrteng ka ‘Main Bharat Hoon, Hum Bharat ke Matdata Hain, kaba long ka thong jong ka ECI kaba ong ‘No Voter to be left behind’.
Kane ka sur jingrwai kala ioh haduh 3.5 lak ngut ki nongpeit (views) bad 5.6 lak kiba la nion (impression) ia ka ha ki social media ba kynthup ia ka YouTube, Facebook, Instagram bad ka Twitter.
Ia kane ka sur la rwai ha ka ktien Hindi bad kynshiap lang bad 12 tylli kiwei pat ki jait ktien hapoh ka ri India kiba kynthup ia ka ktien Bengali, Marathi, Gujarati, Punjabi, Tamil, Telugu, Kannada, Malayalam, Assamese, Odia, Kashmiri bad ka ktien Santali da ka jingthmu ban kynjoh sha kiba bun ki bynta jong ka ri India.
Lyngba kane ka sur jingrwai la khot bad kyntu ia baroh ki nongthep vote ba kin shim khia ia la ka jong ka kamram ban wan sha ki jaka thep vote bad ban pyndep ia ka hok jied nongmihkhmat jong ki. Ka don ruh ka jingkhot kyrpang ia kito ki samla kiba dang long thymmai ha ka kam jied nongmihkhmat bad kumjuh ruh ia kito ki briew kila long kyrpang.
Ia kane ka sur jingrwai la bishar ha ka jingiadon lang jong ka President jong ka ri India ha ka jingrakhe ia ka ka National Voter’s Day (NVD) kaba 13 jong ka ri ha ka 25 tarik u Kyllalyngkot mynta ka snem. Naduh kane hi ka sngi la pyllait paidbah ia ka lyngba ki rynsan social media.
