Mynta ka sngi ka seng saiñ hima sima ka National People Party (NPP) ka pynlong ïa ka jingïalang paidbah (General Meeting) ha Madan Jrisaleiñ, ha kaba la wan ban sakhi da ki hajar hajar ki nongkyrshan ka party na kylleng ki bynta jong ka ri lum Jaiñtia (East bad West) bad kumjuh da ki nongialam ba ha khmat jong ka party naduh u National President u Conrad K. Sangma, u National Vice President bah Prestone Tynsong bad kiwei de ki nongkitkam hapoh ka jylla.
Kham ha shwa jong ka jingialang paidbah kala don ka jingïaid rally naduh na Jowai Police Point (Gate Laban) ter ter haduh ban da poi sha madan Jrisaleiñ.
Ha kane ka sngi kala don ka jingpynkup burom bad ruh kum ka dak jong ka jingkitbok kitrwiang ia ki kyrtong ka Party NPP na ri lum Jaiñtia kiba kynthup ïa u ma Sniawbhalang Dhar na 1-Raliang, ma Wailadmiki Shylla na ka 2-Jowai, ma Comingone Ymbon na ka 3-Raliang, ma Habahun Dkhar na 4-Mowkaïaw, ka kong Santa Mary Shylla na 5- Sutnga, ma Nehlang Lyngdoh na 6-khliehrait (ba la wan mihkhmat da u Dr. S. Shangpung namar ba um lah ba poi na ki daw bym lah kiar) bad u ma Staphanson Mukhim na ka 7-Amlarem Constituency.
Nalor jong u Conrad K. Sangma, bah Preston Tynsong, la ïadon lang ruh ka Dr. Ampareen Lyngdoh NPP Spoke Person kaba dei ka kyrtong na ka 16 East Shillong, u MLA ba rim ma R.L. Tariang, ka kong Phidalia Toi, Co-founder & Member ka NPP, ki nongïalam ba hakhmat ka party, ha ryngkat ki hajar ngut ki nongkyrshan kila poi sha kane ka jingïalang bah (General Meeting) kaba la pynlong ha Madan Jrisaleiñ Jowai.
Na ka liang ka Party ha kane ka juh ka sngi kala ïoh ban pyllait paidbah ïa ka mat treikam (manifesto) jong ka na ka bynta ka snem 2023 haduh 2028, kiba kynthup ïa ka jingpynbha shuh shuh ïa ka skim FOCUS+, ka kam rep kam riang da kaba kyntiew shuh shuh ïa ka jingmang pisa, kumjuh ïaka kam ri jingri.
Kumjuh ruh ka lad pynïohkam pynïohjam ïa ki samla kaba long haduh 5 lak tylli ki kam, ban pynpoi ïa ka pisa ba 5 hajar tyngka sha ki nongseng kam ha ki kharkhana rit ha sor bad nyngkyndong, ban shna ïa ki jaka ïalehkai ha manla ki Block, ka Chief Minister’s Village Connectivity Scheme ban pynpoi surok sha manla ki nongkyndong, ban pynduna ïa ka bai dawai, ban pynïasoh lyngba ki jingkieng ban jam lyngba ki wah khnang ban pynsuk ïa ki paidbah, ban pynbha ïa ka kor ki bor Internet sha ki nongkyndong bad ban shna ïa ka kat liengsuiñ (airport) kaba lah ban pynïasoh sha kiwei de ki ri jong ka pyrthei.
Ïa ka jingïalang ha kane ka sngi la pynïaid da u ma O. Lamin Member ka NPP State Disciplinary Committee bad u ma E. Suting Member NPP, katba ïa ki kyntien ai khublei la ïoh na u ma Thombor Shiwat MDC JHADC.
