U ma Wailadmiki Shylla mynta ka sngi ula leit ban thep kyrteng ialade kum u kyrtong ka NPP ha DC ophis Jowai ban iakhun biang kum u MLA ka 2-Jowai Constituency. Ha kane ka sngi da ki hajar ki nongkyrshan jong u ma Wailad na kylleng ki bynta jong ka Constituency kila ia mih ban leit synran lang ia u ha kane ka jingleit thep kyrteng (filling of Nomination) jong u.
Ki hajar ki nongkyrshan jong u ma Wailadmiki kila pynlong ia ka jingiaid kjat naduh na Newhill Loom Soo Iung haduh ban da poi sha DC ophis, Iawmusiang, ha ryngkat ka jingkynhoi bad pyrta kitbok kitrwiang ia u. Kane ka jingmih ki paid nongkyrshan jong u ma Wailad, kala pynphuhmut phuhmat ia u bad pyniohbor ha ryngkat ka jingkyrmen ban poi biang sha ka thong sa shisien.
