Ka Jingïaseng Presbytery kaba phra (VIII) jong ka War Jaiñtia Presbytery, War Sepngi District kaba la long ha ka Balang Presbyterian Lamin, West Jaiñtia Hills kala poi noh sha kaba kut mynta ka sngi U Blei, ha kaba da ki hajar ngut ki paid riewngeit kiba kynthup na ki rithor jong ka Ri Bangladesh kila tuid sha kane ka Jingïaseng.
Ïa kane ka Jingïaseng Presbytery la sdang naduh ka 10 tarik sngi Thohdieng bad pynkut mynta ka sngi U Blei 12 tarik u Rymphang halor ka phang kaba ong “Ka jingim ba riewblei ha kane ka pyrthei ba mynta” (Titos 2:12). La pynsngew ba kane ka Jingïaseng Presbytery ka dei ka sien ba nyngkong ïa ka Balang Lamin naduh bala seng ïa ka ha ka snem 1857.
Ka Jingïaseng mynta ka sngi U Blei naduh por mynstep la don ka Sacrament jingkhawai U Trai hapoh ka jingpynïaid jong u Pastor ba dei peit ïa ka Balang Lamin, katba ha ka por 10 baje mynstep ka jingiaseng paidbah, la ïoh ban sam ïa ka kten U Blei da u TBn. J.S. Tongper.
Ha ka por shi baje nohphai sngi ka jingiaseng paidbah hangne u Rev. L. Nongrud ula sam ïa ka ktien U Blei da ka pynshong nongrim na ka Gospel jong u Mathaios Lyngnong kaba 3 Dkhot kaba 17, ïa kaba u Pastor Nongrud ula kren shaphang “ka Certificate kaba paka tam”.
Halor kane ka phang u Pastor ula ai nuksa ‘dei lyngba ka jingim jong u Jisu Khrist kaba lah ban pynïoh ha kiba ngeit ïa kata ka Certificate kaba kordor tam’ da kaba u ong ba ki Certificate ba ai da ki briew kim lah ban ïa nujor bad ka Certificate bymjukut ba la ai da U Blei.
Ha ka juh ka por u kyntu jur ïa ki paid riewngeit ba kin ri sumar bad burom ïala ki kmie ki kpa kiba dang don mynta ha sla pyrthei namar ynda ki kmie ki kpa kila leit noh yn ym lah shuh ban pyni markhmat ha ki ïa kata ka jinglehburom ïa ki.
Kum ki khun U Blei u Pastor Nongrud u kyntu ban long kiba sngew skhem ïa ka mynsiem Khristan bad u ong ‘Kaei ka Certificate kaba dei ban bat ha ka jingim ba manla ka sngi kata ka long ban im ryngkat bad u Trai Jisu tad haduh ba ïoh rah ïa ka (certificate) sha ka hima u Blei’.
La pynrhem shuh shuh ïa kane ka Jingïaseng da ki jingrwai na ki khynhun (Choir) bapher bapher kiba kynthup ïa ka Jingïaseng Samla Balang Presbyterian Trangblang, J/S Balang Presbyterian Lamin bad ka Standing Choir Jingïaseng Samla Presbytery kiba rwai ha ka por 1 baje, katba ha ka por 10 waje ki kynthup ïa ka J/S Balang Prsbyterian Pdengshakap bad ka Jingïaseng Balang Presbyterian Khonglah.
Ha kane ka sngi la pynkup burom ïa ki lai ngut ki Tymmen Basan jong ka Presbytery kiba la ai ka jingshakri kaba la kot sha ka 25 snem, ha ka juh ka por la kitbok kitrwiang ïa ki ban kin dang lah ban bteng ïa ka jingshakri kaba bha tam ha ki sngi kiba dang wan.
