Mynta ka sngi u Myntri ba dei peit ia ka Social Welfare Department, Revenue and Disaster Management etc ma Kyrmen Shylla mynta ka sngi ula plie paidbah ia ki ar tylli ki projek “Faecal Sludge Management and Septage Plant / Organic Waste Converter” ha Khliehriat West ha ka jingiadon ryngkat u Deputy Commissioner ka East Jaintia u bah E. Kharmalki IAS bad ki dkhot jong ka DMF Trust East Jaintia Hills District. Ia kitei ki Project la bei pisa da ka District Mineral Foundation Trust, East Jaintia Hills District.
Ka jingplie ia kitei ki ar tylli ki projek ka long kum shi bynta ban rakhe ia ka Swachhata Hi Seva 2021 bad ka jingdap 75 snem ka jingioh laitluid ka ri India “Azadi Ka Amrut Mohatsav”, jong ka Swachh Bharat Diwas. Ia ka prokram la pynlong ha Khliehriat West Community Hall, East Jaintia Hills District. Ia kane ka prokram la pynlong da ka ophis District Swachh Bharat Mission, Khliehriat.
U ma Kyrmen haba kren ha ka jingialang ula pynkynmaw ba ka 2 tarik u Risaw man la ka snem ka dei ka sngi kyrpang kaba la rakhe ia ka lyngkhu sngi kha jong u Mahatma Gandhi bad ha kum kane ka sngi la ju pynlong ia ka jingpynkhuid ia ki shnong ki thaw ne ki dong ki shnat. Kumta u khot ia baroh ki nongshong shnong naduh ki kyndong kynshrot haduh kiba shong ba sah ha ki jaka sor ban pynlong ia ka District baroh kawei kaba khuid ba suba. Ula iaroh ruh ia ka kynhun jong ka District Swachh Bharat kaba la shim khia ban pynlong ia ki prokram ba iadei bad ka jingkhuid jingsuba.
U ma Kyrmen u la ong ruh ba ka jingdon ka District Minerals Fund (DMF), MGNREGA bad ka jingiasnohkti lang jong ki shnong ki thaw yn sa lah ban wanrah ia ka jingiada ia ka mei mariang.
U bah Kharmalki DC, ula ai ka jingpynshai halor ka Organic Waste Converter bad ka Faecal Sludge Management Plant Project bad u la ong ba dei ka East Jaintia Hills kaba la pyntrei nyngkong eh ia kane ka jait projek hapoh ka jylla Meghalaya.
U DC ula kdew ruh ba ki dang don shibun ki wei pat ki projek ki ban sa pyntrei hapoh ka East Jaintia Hills kiba kynthup ia ka Bio Medical Waste Processing Unit, ka Large Scale Compose Plant, ka Co-process of plastic waste in cement plant bad ka Water Treatment Project.
Ha kane ka jingialang la pynbna ba ka shnong Chiehruphi ka dei ka nyngkong ban ioh ia ka nam ODF (Open Defecation Free) Plus hapoh East Jaintia Hills District bad u Myntri u la sam ia ka khusnam sha u Waheh Shnong katei ka Chiehruphi. Ia ka khusnam Swachhata Champion Award 2021 la sam ruh sha ki Waheh Shnong jong ka Lamyrsiang bad ka Cham Cham kiba la don bynta ban wanrah ia ka khuid ka suba ha ki shnong ki thaw jong ki.
La sam ruh ia ka khusnam Best Swachhata Champion Award 2021 hapoh ka thup Best Swachhghari sha u ma First Suchen na ka shnong Khliehriat bad ia u ma Arly Papeng na ka shnong Saipung. Ka Jaintia Eastern College NSS Unit ruh kala ioh ia ka khusnam jong ka Swachh Bharat Mission.
Kiwei de kiba la ai jingkren ha kane ka jingialang ki long u W. Diengdoh, State SLWM Consultant State Swachh Bharat Mission(Gramin), Meghalaya, Shillong, u B. Dkhar, District Programme Manager,Jal Jeevan Mission (JJM), bad u W. Buam, District Coordinator Swachh Bharat Mission (Gramin), East Jaintia Hills District.
La pynshit pynsyaid ia ka prokram da ki rwai ki shad bala shim bynta da ka Gracious Disciple Group Wapung Skur, ki samla na Byndihati bad u Nibalamon Ryngkhlem.
