Ka Movement For Change (MFC) ka kynhun treimon sngewbha kaba lamkhmat da u nongtrei mon sngewbha u samla rangbah Chandame Sungoh kum u Chief Convenors bad u Phermaiñ Samayang Convenor kila leit ïakren bad ïakynduh bad ai jingthoh ha ki Returning Officer bad Deputy Commissioner jong ka West Jaiñtia Hills District.
Na ka liang jong ki kim ïoh lad ban ïa kynduh markhmat bad kitei ki heh ba peit ïa ka Election ki la ai ïaki jingthoh ha ki Personal Secretary jong ki ban pynpoi pat sha ki, kumjuh sha ki Returning Officers jong ka 1- Nartiang Constituency, 2- Jowai Constituency, 3- Raliang Constituency bad 4- Mowkaiaw Constituency ban ujor pyrshah ïa ka jingleh arsap bad jingleh shiliangkhmat jong ki Waheh Chnong ïa ki Party bad ki Kyrtong bapher bapher hapoh kine ki Constituencies.
Ka Movement kala ïoh ïa ka jingujor na ki paitbah bad wat na ki Candidates ruh ba don ki Waheh Shnong kiba lehbor ban thombor ïa ka hok jong ki paidbah. Haba wan ki Candidates kiba bun pisa kiba kham bun nongbud te ki pynkyrpang bha ïa ki jingpynkhreh ki jingpyntip hapoh shnong poh thaw bad ki rukom kren rukom pynïaid meeting.
La ïathuh lada wan pat da ki bapli ki candidates ki bym don pisa ki bym don nongbud te wat tang ka jingtip ruh kim ïa ai hapoh shnong poh thaw. Ym don nongshong shnong ba wan ban sngap wat ka rukom pynkhreh ka rukom pynïaid bad ka rukom kren meeting ruh ki pynïapher bad leh arsap bha.
Kane ka jingleh jong ki ka long kumba i beiñ bad ïuhroit ïa ka hok jong ki wei pat ki Party bad ki Candidates. Kum ki Waheh Shnong hi kim dei ban ïashah liang lane leh arsap ïa kino kino ki Party lane ki Candidates namar ba maki ruh ki don kahok ban pynsngew pynsngap ïa ki nongrim bad ki jingmut jingthmu jong ki.
La ong ba ki paitbah ruh ki don kahok ban sngew ban sngap ïaki jingkren ki nongrim bad ki jingmut jingthmu jong ki Party bad ki Candidates, kane ka jingleh shiliang bad jingleh arsap jong ki ka pynkheiñ ïaki Rights jong ki Party ki Candidates ïaka Rules of Democracy bad ïaka Model Codes of Conduct.
Ka Movement ka kyrpad jur ïa kine ki Returning Officers bad ïa u Deputy Commissioner ruh ban shim khia ïaka ne ka kam. Ka kyntu ruh ïaki Rangbah Shnong baroh ba kim dei ban pynpaw ïa kum kane ka jingleh arsap bad jingleh riewkhlaw jong ki, ki dei ban ïatreilang naka bynta ka bha ka miat ka ïaid beit ïaid ryntih jong kane ka Election.
Lada ka Movement ka dang lap ïaki Rangbah Shnong kiba leh ïa kum kine ki kam arsap te kan leit ujor shi syndon sha u Chief Election Officer jong ka Election Commission ka jylla.