Ki khubor kiba la iohlum na kylleng ki shnong ki thaw jong ka 3-Raliang Assembly Constituency la ong ba katba nangjan ka 27 tarik mynta u bnai la ong ba u ma Lakhon Biam u Kyrtong jong ka Bharatiya Janata Party (BJP) u la nangiohmynsiem bad kyrmen ban poi sha ka thong ha kane ka elekshon 2023 naba kiba bun ki dkhot barim jong ka United Democratic Party (UDP) bad ki dkhot jong ka National People Party (NPP) ki la nangwan ha ka ban kyrshan ia u ma Lakhon Biam.
La ong ba kane ka jingwan kyrshan jong ki ia u ma Lakhon Biam ym tang ban kyrshan ia ka Party BJP, hynrei kum u briew uba la bit la biang ka jingnang jingstad bad kum u briew uba ki duk ki rangli, ki rit ki ria uba sngewthuh ban ia kren bad u briew uba ym don ka jingniew shiliangkhmat ia baroh ki shnong ki thaw jong ka Constituency bad ia kane la iohi na ka jinglong jong u kum u MDC jong ka JHADC u briew uba don ka jingkitkhlieh ym tang ia ka Constituency jong u hynrei ia ka Ri Jaintia hi baroh kawei bad kane ka paw na ka jingpyrshah jong u ia ka jingthmu jong ka Executive Committee JHADC ban buh ia ki Toll Gate ha man la ki elaka ban lum khajna na ki nongshong shnong jong ka Rlum Jaintia
La ong ruh ba ka jingwan kyrshan jong ki dkhot barim jong ka UDP bad ki nongkyrshan jong ka NPP halor ka jingshah iehbein jong kiba bun ki shnong ki thaw jong ka Constituency ha ka liang ki surok kiba long u budlum jong ka kit ka bah bad kum juh ha ka liang ki Umbam Umdih bad ki longiing longsem, kiba sah kynthei sah khynnah bad ki khunswet khunrangli kiba donkam ia ka jingiarap. Nangta la ong ruh ba halor kine ki jingshah iehbein ha ka liang ki surok bad ha ki kam pynroi ri, ki wan ban kyrshan ia u ma Lakhon Biam bad ban ioh da u nongmihkhmat uba thymmai u briew u ban peit salonsar ia ka bha ka miat ki nongshong shnong ka constituency bad khamtam ha ka ban pynbha ia ki surok, ki lynti ki syngkieng ki ba poi sha ki shnong ki thaw jong ki.