Katba ka sngi ban thep vote sha ka Meghalaya Legislative Assembly kala hajan, kumta ka jingpynkhreh jong ki party bapher bapher ban pynlong ia ki lympung ialap elekshon bad ki rali kala iaid shait shait. Kumta ha kaba iadei bad kane na ka liang ka ophis District Election Officer, Ribhoi District kala pynmih ia ia ki kyndon kiba la khang pyrshah da ka tnat elekshon jong ka ri India.
La khang ban buh ia kino kino ki poster, ki hording, ki lama bad kiwei jong kino kino ki party ha ki jaka sorkar. Yn ym shah ban dro ne thoh ha ki kynroh ne ban tah ia ki poster.
Ia kum kine ki poster, ki lama, ki hording bad kiwei lah ban buh ne pynieng ha ki jaka jong ki riew shimet da ka jingiohbor na ki trai jaka
La khang ruh ia u kyrtong, ki nongbud jong u ne ki seng saiñ hima sima ban kin pyndonkam ia kano kano ka jaka jong ki riew shimet khlem da ioh lypa ia ka jingaibor na u trai jaka.
La pyntreikam ruh ia ka kyndon 127 jong ka Representation of the People Act, 1951 kaba khang ia ka jingiatakhuh jong kino kino ki kynhun seng saiñ hima ha ka jingpynlong ia ki jingialang ne ki rali. Kumjuh ruh yn ym shah ia kino kino ki party ban pynjot ne pynjulor ia kino kino ki jingthoh ne jingbuh jong kiwei pat ki party. Yn ym shah ia kano kano ka party ne u kyrtong ban ialap elekshon hapoh 100 metar ka jingjngai na ka Polling Station. Lada ki leh ia kane ka kam ialap elekshon ka pynpaw ba kila pynkheiñ ia ka kyndon 130 jong ka aiñ jied nongmihkhmat 1951. Dei ban ai jingtip sha ka tnat Pulit jong kato ka thaiñ, dei ruh ban da ioh bor shwa na ka tnad elekshon ha shwa ban pynlong ia kino kino ki jingialang. Lada pyndonkam ia ki kor pynsawa ia kine ruh dei ban iohbor lypa, khnang ba kan ym ktah ia ka hok jong uno uno briew ha ka liang ka suk ka saiñ bad ka jingbympynwit pynthut ia longïing longsem ki briew, ia kane la shim khia bha da ka tnad Elekshon.