Ki nongtrei ka Lakroh MHEP ha ka 1 tarik mynta u bnai ki la ioh ban pyllait ia uwei na ki kynja khla uba dei u ba na ka jait Leopard ba long ruh u mrad ba la kynthup ha ka Thup ki Species hapoh wildlife.
Ia une u khun khla la ioh ban pyllait da u Dapmon Pohtam ha ka por ba u dang pynkhuid ia ka phyllaw jong katei ka jaka pynmih bording ryngkat bad u Eddy Kery Pohtam Lakroh, bad ki la leit ban aiti noh mynta ka sngi sha ka tnad wildlife jong ka Forest kaba don ha Jowai, khnang ba ka tnad sorkar kan ioh ban leh ia kaba don kam.
U Eddy Kery Pohtam uba long ruh u President ka Jaintia Students Union War Jaintia Circle u la ong ba u sngewkhia shibun eh ia ka jingpyniap dusmon ia ki mrad khlaw khamtam ia kine kiba la jan duh jait. U la kyrpad jur sha ki nongshongshnong ka thain ban kiar bad ban sangeh ia ka jingriam bad jingsiat kput ia ki sim ki doh ba bun jait ha ki khlaw ki btap namar kane ka jing mlien kan sa pynlong ba kine ki mrad kin nym don shuh ha sla pyrthei bad ngin nym ioh lad shuh ban iohi ia ki ha ki sngi kiban wan. Ka long kaba sngewtynnad shibun eh ban iohi ia kine ki khun khla ba ki dang don ha ki khlaw ki btap ka thain ha kaba ka lah ruh ban pynim ia ka mei mariang namar ka jingdon ki mrad khlaw ka iarap ia ka mariang ban long kata kaba ai jingiashaniah markylliang ia ki jait jingthaw ban pyneh pynsah ia ka mariang. Ha ka jingiakynduh bad u ma Passah Range officer i/c wildlife wing, u ma Eddy Pohtam u la ban ruh ba ka tnad wildlife kadei ban ai jingpyntip sha ki shnong ki thaw khnang ba kin tip ban kheinkor bad sumar ban ym pyniap ia ki mrad khlaw bad ruh ba kin tip ia ki aiñ pynshitom kat kum ka Wildlife Protection Act 1972 kaba lah ban set along kumba 3 snem ia kiba pynkhein ia ka ain iada ia ki ne ki mradkhlaw.
