Kiba bun na ki paidbah ba pyndonkam ïa ka Network Airtel ha kiba bun ki bynta jong ka nongbah Jowai, khamtam sha ki thaiñ ba don shapoh shnong jong ka sor Jowai kila kynduh jingeh shibun namar ka jingthut shaba palat jong kane ka Network Mobile.
Katkum ka khubor ba la ïoh lum la ïathuh ba kane ka jingthuh ka Network kala dkoh treikam naduh ka 7 tarik u Rymphang, hynrei kane ka Network ka dang ïaibteng ban don ha ka jingthuh haduh mynta ka sngi ba thoh ïa ka khubor.
Ki katto katne ki paidbah na ka kitei ki dong ki la pynpaw ka jingsngewdiaw halor kane ka jingdkoh jong ka rukom ai jingshakri jong ka Airtel ïa ki paidbah da kaba ong ha kum kine ki por kiba bun hi na ki donkam ban leh ïa ki online na ka bynta ki kam bapher bapher katkum ka juk mynta bad kane ka la ktah kumjuh ruh ïa ki khynnah skul.
La ïathuh da ki paidbah “Wat tang ban phone ha ka por ba donkam ne sent ïa ki dur bad kiwei de kim ïoh satia wat la ki don ha ki bynta jong ka sor ruh la long pynban kum sha ki thaiñ nongkyndong ki bym don wat ïa ki Tower Mobile”.
Kiba bun ki pynpaw lada kane ka Company ka dang dkhot ban ai ka jingshakri, la dei ban nym pyndonkam shuh ïa ka namar kam myntoi aiu ban don tang ka Sim Card katba ka Network kam treikam satia, kane kala pynbitar shisha ïa kitei ki paidbah ba pyndonkam ïa ka Network Airtel.
Katkum ki jingujor na ki paidbah la ïathuh ba kine ki dong ba shah ktah eh na ka jingthuh Network Airtel ki long ka Lumkyrwiang, Iongpiah, Chilliang Raij bad kiwei de ki dong ba marjan.
Halor kane ka jingeh jong ki paidbah na ka liang ki bor ba dei peit jong ka Company Airtel kila dei ban pynbeit noh kloi kloi ïa kane bad ban leh ïa kaba donkam.
