Ka ophis jong ka District Legal Services Authority (DLSA) West Jaiñtia Hills District, Jowai ka la sdang ban pynlong ia ka prokram ‘Pan India Awareness and Outreach” kaba long shi bynta na ka ‘Azadi ka Amrit Mahotsav’ (AKAM) bad ‘Legal Services Week’ kaba la sdang naduh ka 2 tarik u Risaw ka ban kut haduh ka 14 tarik u Naiwieng, mynta ka snem, kaba dei ruh shi bynta na ka jingrakhe ia ka jingdap 75 snem ka jingioh laidluid ka Ri India.
Ha nongbah Jowai la sdang rakhe ha kane ka sngi saitjaiñ ha District Library Auditorium, Mynthong Jowai bad ia ka prokram la pynkhreh da katei ka ophis DLSA ha ryngkat ka jingiarap jong ka Meghalaya State Legal Services Authority.
Ka kong B. Khriam District and Sessions Judge-cum-Chairperson, District Legal Services Authority, WJHD ka la pynsngew ba ka National Legal Services Authority (NALSA) kala bthah bad ai jingbit ia ka ophis ban pynlong ia kane ka jingleh burom naduh ka 2 tarik haduh ka 14 u Naiwieng, 2021.
Lyngba kane ka prokram kan iarap ban pynphriang sha ki paidbah khnang ba kin tip shaphang ka rukom treikam jong ka DLSA kaba ki paidbah ki lah ban ioh jingiarap lyngba ki Para Legal Volunteer (PLV), ki Muktiar khlem da donkam jingsiew eiei wat shi tyngka ruh.
Ka la ong lyngba kane ka prokram ka ophis kan pynbna paidbha ha kylleng ki jaka ha ryngkat ka jingiatreilang jong ka ophis DLSA, ki nongïalam shnong, ki nongialam ñiam bad ki riew paidbah na ka bynta ban kyntiew ia ka District hi baroh kawei.
Ha kane ka sngi la don ruh ka jingialeh drama ban ai jinghikai halor ki kyndon treikam jong ka riti shynshar ka Ri na ka bynta ki lad jingiada ia ka hok longbriew da ki samla pule ka NSS Unit, Kiang Nangbah Govt, College, Jowai bad la don ka jingrwai na ki kynhun jong ka Jowai Bar Association. Kiwei de kiba ai jingkren ha kane ka sngi ki long ka long R.M Kharsyntiew MJS Chief Judicial Magistrate-Cum-Secretary DLSA West Jaiñtia Hills District, u Bikram D Marak Superintendent of Police ka WJHD.
