Ka ophis u Deputy Commissioner ha ryngkat ka ophis District Sports Officer, West Jaiñtia Hills mynta ka sngi 20 tarik u Rymphang kila pynkut ïa ka jingïakop mareh ‘Run for Democracy’, kaba la sdang na Madan Kiang Nangbah Stadium da kaba mareh lyngba ki dong hapoh ka sor Jowai bad pynkut biang ha Indoor Sport Hall.
Ïa kane ka Run for Democracy la wan ban kaweh ïa ka lama da u Sylvester Phanbuh, MCS-EAC, West Jaiñtia Hills kum u kongsan, ha ka jingdonlang u ma Khroobok Passah, District Sports Officer, West Jaiñtia Hills, ki dkhot ka West Jaiñtia District Sports Association kynthup ïa u ma EMH Passah, Working President, WJDSA, ma Patrik Lamare, Vice-President, WJDSA nalor kiwei de.
Na ka bynta ki nongjop ha kane ka jingïakop “Run for Democracy 2023” ha ka liang ki shynrang la jop da u Dasaman Kyndait uba la pyndep hapoh ka por 21 minit 38 sekhon bud sa u Sanctify Paleuwa hapoh 22 minit 25 sekhon, nangta sa u Marso Kyndait hapoh ka por 22 minit 40 sekhon.
Katba ha ka liang ki kynthei la wan nyngkong da ka Happiness Phawa kaba la lah ban pyndep hapoh ka por 31 minit 13 sekhon bud sa ka Mini Kyndait kaba pyndep hapoh ka por 36 minit 39 sekhon.
Ïa ki khusnam sha ki nongjop ha kane ka “Run for Democracy 2023” la sam da u kongsan lem bad ki dkhot ka WJDSA.
