Ka jingdheng kali kaba la neh bun bun kynta mynta ka step ha ki bynta jong ka shnong Mookyndur khamtam ha Wahmynsoo na ka daw jong ka jingduh noh jong kawei ka trok kala wan rah ia ka jingsahkut kali kaba jur bha ha katei ka jaka.
Katkum ka khubor bala pyllait da u Superintendent of Police, West Jaintia Hills District u Bikram D. Marak, MPS ula ong ba kane ka jingdheng kali ka dei na ka daw jong ka jingduhnoh jong kawei ka trok ha Wahmynsoo, hynrei u la ong pat ba na ka liang jong ki Pulit jong ka Ummulong Beat House kila shimkhia ban pynbeit ia kane ka jingeh bad kumba long katta janmiet ki kali kila lah ioh lad ban iaid suki suki.
Shuh shuh na ka liang u SP ula kyntu ia ki nongniah kali ba kim dei ban ia knieh iaid (overtake) hynrei ki dei ban iaid ha la ka jong ka liang surok, khnang ba yn lah ban pynlait kloi ia kane ka jingsakut kali.
Kumba long mynta u surok bah NH-6 ula don hapdeng ka jingsniew kaba la sha palat kaba lah ban wanrah ia ka jingduh jong ki kali man la ka por bad kaba kham ma shuh shuh ka long ba ka lah ban wanrah wat ia ka jingiatakhuh kali ne ki jingjia ba sngewsih tang na kane ka daw jong ka jingsniew palat pud. Ki bor sorkar kila la dei ban peit ia kane ka jingeh kaba ki nongiaid nongieng ki iakynduh. Dang shen ka JSU ka la ujor sha ki 7 ngut ki nongmihkhmat jong ka ri lum Jaintia halor kane ka jingsniew palat u surok.
