Ka jingthep vote ha ki 5 tylli ki Constituency kiba don ha West Jaiñtia Hills kila long kiba ïaid beit ïaid ryntih bad ka jing wan poi jong ki nongthep thep ka la kot sha ka 89.24%
Haba phai sha ka jingwan thep vote jong ki paidbah nongshong shnong hapoh ka District hi baroh kawei kala long kaba ïaid beit ïaid ryntih khlem da don kino kino ki jingmih klumar, hynrei ka la don ka jingthuh ki machine thep Vote ha ki katto katne tylli ki Polling Station ha Jowai hynrei la lah pat ban pynbha kloi ïa ki.
Katkum ka jingïoh jingkheiñ na ka tnat Election naduh ka por 10 baje mynmiet la ioh jingtip ba hapoh ka 1-Nartiang ka jingwan ki vote kila poi sha ka 88.69 %, ka 2-Jowai kala poi 85.95%, ka 3-Raliang kala poi 88.56%, ka 4-Mowkaiaw kala poi 91.05% katba ka 7-Amlarem kala poi 90.98%.
Ha ka jingleit jurip ha ki katto katne tylli ki shnong hadpoh West Jaiñtia la ïoh sngew ïa ka lyer ki Candidate kiba mih nala ki shnong la jong ki kham ïoh bun ka Vote lada ïa nujor bad kiwei ki kyrtong hynrei ki lah ban duna na kiwei pat ki shnong jong kiwei pat ki kyrtong.
Katba na ka liang ki katto katne ngut ki nongthep vote thymmai hapoh ka sor Jowai kila pynsngew kane ka dei ka sien ba nyngkong ïa ki ban ïoh jied ïa ki nongmihkhmat, kumta ki pynpaw ka jingsngewkmen ban ïoh kum kane ka lad jied nongmihkhmat.
Ki kyrmen skhem ba ka jingjied jong ki ïa ki nongmihkhmat ha kane ka kynti kan wanrah shisha ïa ka jingkylla ha ka synshar khadar, bad ki kyrmen ban ïoh ïa ka synshar kaba khuid ba suba bad ka jingroi jingpar ha baroh ki liang.
