Ka Women’s Welfare Organisation, Seiñraij, Jowai mynta ka sngi kala rakhe ïa ka sngi kyrpang jong ki kynthei ne ka ‘International Women’s Day’ ha ka jingïalang ba la pynlong ha Dorbar Niamtre ka Seiñraij, ba la pynïaid da ka kong Hima Lakiang, Chairperson WWO-Seiñraij.
Ha kane ka sngi ka kong M. Lakiang, DMC-SSA, West Jaiñtia Hills kala long ka kongsan, ha ryngkat ka jingdonlang u G.H. Bareh, Executive Member, Seiñraij kum u Symbood kongsan, ka G. Pde, Vice-Chairperson WWO-Seinraij, kong Aloma Passah, Founder Member WWO-Seinraij nalor kiwei de.
Ka kong M. Lakiang, District Mission Coordinator, SSA-West Jaiñtia Hills haba ai jingkren kala batai halor ka phang jong kane ka sngi kaba ong “Digital Innovation and Technology for Gender Equality”. Kala ong ba kane ka phang la pynshong nongrim ïa ka ha ki lai ki rong, ka rong Purple halor ka Hok bad ka kyrdan, rong jyrngam halor ka jingthrang jingangnud bad ka rong ba lieh halor ka jingkhuid jingsuba.
Shuh shuh ka kong M. Lakiang kala ong katkum ka jingstad ka bor saian la ïohi shibun ki jingkylla bad ka long ruh kum la lad ban pynsuk ïa ka rukom treikam ha kiba bun ki liang, hynrei lada phai pat sha kane ka phang jong kane ka sngi ki kynthei ka long kaba donkam ban bud ïa ka ha ki jingmut jingpyrkhat.
Katba u ma G.H. Bareh ha ka jingkren ula ong lada ïa nujor ïa ka jinglong ki kynthei hapoh ka jylla ki long shisha kiba donbok ha kiba bun ki liang kiba la ïoh ïa ka kyrdan ba kham kyrpang, ha ka juh ka por ula kyntu ïa ki kynthei ba long kiba burom ïa ki khlieh ka ïing katkum ka riti ka dustur.
