Ka Jaiñtia Student Union (JSU) hadien ba lah ioh iaka khubor ba naka liang u Himanta Biswa Sarma u Myntri Rangbah ka Assam hapoh ïing Dorbar Thaw aiñ ka Assam u la ong ba ka shnong Mukroh ka hap hapoh Assam, kane ka jingkren jong u Myntri Rangbah ka Assam ka lah pynbitar ia ka seng bad khamtam iaki nongshong shnong ka shnong Mukroh bad ki pait ka bri u Hynñiewtrep hi baroh kawei.
Ka seng ka la phah iaka kyrwoh sha u Myntri Rangbah ka jylla u Conrad Sangma ban iakren bad u Himanta u Myntri Rangbah ka jylla Assam ba um dei ban kren laplah kumne da kaba kam ei ia ki shnong bad ki jaka kaba hapoh Meghalaya ki ba don ha khappud bad ka Assam. Ka seng ka ong ba kane ka jingkren u MR ka Asaam ka la nang ai ding shuh shuh bad kan sa warah ia ka jingiapher jaitbynriew sa shisien hapdeng ki nong Assam bad ka jylla Meghalaya.
Ka seng ka phah ruh iaka kyrwoh kaba shai kdar sha u MR ka Assam ba u dei ban tih jylliew shuwa khnang ban tip ia ka jingshisha ba kine ki jaka ki hap sha kaei ka jylla ha shuwa ban un kren hapoh ka ïing Dorbar thaw aiñ ka Assam namar ka jingkam ei ka jong u iaki jaka kiba don hapoh u pud u sam ka jylla Meghalaya kan ialam bakla ia kiwei pat ki nongmih khmat kiba don lang hapoh ka ïing Dorbar thawaiñ ka Assam.
Ka seng ka la ong ruh ba u Himanta Biswa Sarma u dei ban tip shai ba ka shnong Mukroh ka hap hapoh ka jingpeit jingkhmied jong ka JHADC bad ia ka synshar khadar ruh lah ioh bor na ka JHADC ym kumba kam u MR ka Assam ba katei ka jaka ka hap hapoh West Karbi Anglong District.