Mynta ka sngi u Myntri ba dei peit ia ka tnad ka koit ka khiah u James K. Sangma u la wan ban plie pyrda ia u mawnongrim ban kyntiew kyrdan ia ka PHC Shangpung West Jaiñtia Hills District sha ka Community Health Centre (CHC) ba pura, ha ka jingiadon donlang u MLA ka thaiñ u ma Comingone Ymbon, u Deputy Commissioner ka WJHD bah Garod LSN Dykes, u SP WJH u D B. Marak, u Waheh Shnong Shangpung Pohshnong ma R. Rabon, Additional DM&HO West Jaiñtia Hills ka Dr. B Challam, Medical & Health Officer ka Shangpung PHC Dr. Chyrmang, ki doktor, ki nurses bad kiwei de.
Ia kane ka prokram la pynlong ha Communittee Hall Shangpung Pohshnong, ha ka jingialang kaba la pyniaid da u District Medicla & Health Officer, West Jaintia Hills District u Dr A. Ajar.
U MLA ka thain u ma C. Ymbon, haba kren u la ong ba u dap da ka jingkmen kaba khraw ha kane ka sngi, da kaba u la ai khublei ruh ia u CM, u DHS ka jylla bad kiwei kiba iadonkti lang ban iatrei shitom ha ka ban pynurlong ia kane ka jingkyntiew kyrdan ia ka PHC Shangpung sha ka CHC. U la ong ruh kat kum ka kyrdan PHC don tang 10 jingthiah na ka bynta ki nongpang, hynrei ynda la kyntiew sha ka CHC yn pynbun shuh shuh ia ki jingthiah kumjuh ia ki Doktor bad ki nurse, kumba long mynta u la ong ba ia ka sanction na ka bynta ban tei ia ka Building jong ka CHC la dep, hynrei na ka liang jong u ma Coming u kyntu ia myntri ba dei peit ia ka tnat ka koit ka khiah ban pynkhreh lypa noh ia ki nongtrei naduh ki doktor ki nurse bad kiwei, ha kane ka CHC bad na ka liang jong u ruh un shim khia ia kane ka kam.
Na ka liang jong u ma Coming u kyntu ruh ia ki nongshong shnong bad ka thaiñ ba kin iatreilang bad ka tnat ka koit ka khiah khnang ba ki kam kin long kiba iaid beit iaid ryntih. U kyntu ruh ia ki nongtrei kane ka CHC kaba mynta ba kin long kiba trei shitom na ka bynta ka bha ka miat jong ki nongpang.
U kongsan u James K. Sangma, haba kren u la ai ka jingiaroh ia u ma C.Ymbon kum u MLA ka thaiñ ba dei lyngba ka jingshim khia jong u la lah ban pynurlong ia kane ka jingthrang jong ki paidbah. U la ong ruh ba ka jingkoit jingkhiah ka dei kaba kongsan tam kumba long mynta ha kaba la bun ki jait jingpang bapher bapher ha kine ki sngi.
Na ka liang jong u, u la ong baroh ki briew ha kane ka sla pyrthei ki la ngat ha jing shah lyngshop ha ka khlam Covid-19, kaba la ktah jur bad pynhiar shisha ia ki briew sha trai ha baroh ki liang. Hynrei kumba long mynta la iohi ba kane ka khlam ka la sdang hiar suki suki, kumta u khim lynti ba kane ka khlam kan sa jah noh, u la ai khublei kyrpang ruh ia ki Doktor ki Nurse bad baroh kiba don bynta ha kaban ia khun ia kane ka khlam.
Ha kane ka sngi la ioh ruh ia ka jingrwai pdiang na ki nongtrei jong kane ka PHC.
