Ka Pasadwar Cluster Sports meet kaba 14th ka la long ha ka shnong Kamsing ha ka 15 bad16, March 2023. Kane ka sports meet ka long kaba khampher bha namar ki khynnah skul, ki nonghikai, ki riewpaitbah ki hap pyndonkam da ki lieng kynda ha ka leit ka wan lyngba ka wah Myntdu (Tisang) ban poi ha ka shnong Kamsing, namar kane ka shnong kam pat don surok kali, ka shnong Kamsing ka don ha khappud bad ka ri Bangladesh.
Ha kane ka sports meet la wan iashim bynta da ki 9 tylli ki skul, kynthup 6tylli ki lower primary school bad 3 tylli ki upper primary school na ki saw tylli ki shnong kiba hap hapoh ka cluster Pasadwar, kita ki long ka shnong Pasadwar, Lumpyngngad, Kharkhana bad ka shnong Kamsing.
Ha kane ka sports meet kaba arsngi la don shibun ki jait jingialehkai kiba pynbyrngia ia ki nongpeitkai da ka jingiashim bynta jong ki khynnah skul jong ka cluster. La wan plie pyrda ia kane ka sports meet da u General Secretary ka shnong Kamsing Bah Augustine Pamblang ha ka jingiadonlang ki Rangbah shnong, ki nonghikai, ki nongkit kam shnong, ki khynnah skul bad ki riewpaitbah jong kine ki shnong kiba hap hapoh ka cluster.
La sam ruh ia ki khusnam sha ki nongjop ha ki bynta bapher bapher mynta ka sngi. Ia ka nam Best Match Pass na ki skul upper primary level la ioh rah da ka Kharkhana UPS. Haka kyrdan lower primary level la ioh rah da ka Pasadwar govt LPS. Best discipline la rah da ka Kamsing LPS bad kumjuh ka football match na ka liang ki shynrang Upper primary school la rah da ka Kharkhana UPS na ka liang ki kynthei la jop da ka Pasadwar UPS. Na ki skul lower primary level pat na ka liang ki shynrang la rah da ka Kamsing LPS bad na ka liang ki kynthei la rah da ka Kharkhana govt LPS.
La ai ruh ia ki khusnam Best Athletes ia ki saw ngut ki khynnah kiba paw bha ha ki jingialehkai, kita ki long na ka liang ki shynrang UPS la ioh rah da u Sumon Tudu ka Kharkhana UPS, na ki kynthei UPS la ioh da ka Daiomika Shylla ka Pasadwar UPS, na ki khynnah lower primary level na ka liang ki shynrang la ioh rah da u Federation Swer ka Kamsing LPS na ki kynthei pat la ioh rah da ka Kobita Tati ka Kamsing LPS. Kane ka dei katkum ka khyrwoh ba la phah da ki nongkit kam ka cluster.
