Ka jingdon jong ki Self Help Group (SHG) ha ki thaiñ bapher bapher hapoh ka jylla ka iarap ban kyntiew ia ka ioh ka kot jong ka Jylla hi baroh kawei, ia kane la pynpaw da u Myntri ka Sorkar Jylla ba dei peit ia kane C&RD bah Hamlet Dohling ha ka jingialang pynkup burom ia ki SHG ha shnong Shangpung.
Kane ka prokram ka dei shi bynta na ka jingpynkhreh ïa ka jingrakhe dap 50 snem ka jingïoh jylla ba pura, na ka liang ka ophis jong u BDO ka Laskeiñ C&RD Block lyngba ka Meghalaya State Rural Livelihood Society mynta ka sngi Balang kala pynlong da ka prokram pynkup burom ïa ki SHG kaba la tip kum ka ‘SHG Mega Camp’ ha madan Shangpung Moosyiem West Jaiñtia Hills District.
Ha kane ka prokram la pynkup burom ïa ki kynhun Self Help Group ka thaiñ, ïa ka nam (Best Performing Village in SHG Saturation) la jied ïa ka Manbha VO Mulieh, Rikune Vo Iooksi Kyan Mynsar Thlong Mu, ka Wasakhi Vo Mowkyndeng, ka Pynteinam VO Puntei bad ka Pynjanai Vo of Muthlong Rim.
Ïa ka nam (Best Performing Vo) la jied ïa ka Synroplang Thadmuthlong A, (Best Performing FL C) ka ïoh da ka kong banri Papiah na ka Sngewbhalang SHG Thadmuthlong, ïa ka nam (Best performing ICRP) ka kong Junemonth Suchiang na ka Dathranglang SHG Shnangpung Khliehmushut Bad ka nam (Best Performing BC) da ka kong Emilia Sten.
La sam ruh ïa ka Loan Sanction sha ki SHG lyngba ka Meghalaya Rural Bank kiba la don 31 tylli ki SHG ha ka jingkot kaba 31 lak tyngka.
U bah Hamlet Dohling kum u myntri ka C&RD jong ka sorkar jylla uba long kum u kongsan jong kane ka sngi ula ai ka jingïaroh ai ki kynhun Self Help Group (SHG) kiba la trei shitom ha ka kam jong ki kaba manla ka sngi.
Ula pynsngew ruh ba ka sorkar ka don ka thong ban pynrung ïa ki SHG hapoh ka sorkar la kumno kumno haduh 44 hajar tylli ki SHG ha u snem ban wan, na ka liang ka Meghalaya State Rural Livelihood Society kala la pynlum pynlang ïa ki longkmie ban seng ïa ki Self Help Group kiba la kynjoh mynta sha ka 34 hajar tylli ki SHG hapoh ka jylla.
Tang hapoh ka Laskeiñ Block ki don haduh 1697 tylli ki SHG bad hapoh ka West Jaiñtia Hills District ki don haduh 3253 tylli ki SHG, kane kala wanrah ka jingkylla hapoh ka jylla na ka bynta ban weng ïa ka jingduk jingkyrduh hapoh ka jylla, ha ka juh ka por ki lah ban ïoh jingïarap na ka sorkar da kaba ai ram ïa ki lyngba ki bank kiba ïadei kam bad ka sorkar.
Ha kane ka sngi la ïadon lang da u myntri ka koit ka khiah ka sorkar jylla u James P.K Sangma, uba la pynsngew ba kane ka prokram ba ka pynlong ha kylleng jylla ha kylleng kan lah ban kyntiew ïa ka ïoh ka kot jong ka jylla lyngba kine ki SHG kiba don ha ki shnong bapher bapher kiba pynmih ïa ki jingbam bad ki mar ba bun jait. Kiwei de kiba ïadonlang ha kane ka sngi ki kynthup ïa u MLA ka thaiñ ma Comingone Ymbon, u DC bah Garod LSN Dykes, u Bikram D Marak (SP), u BDO ka Laskeiñ ma B. Langbang bad kiwei ki ophisar sorkar ha ryngkat ki SHG ka thaiñ kiba la wan rah ia ki mar jong ki jingbam kiba kila pynmih ha kane ka prokram.