U Krai u dei u wei na ki jingthung mynbarim (indigenous Crop) uba la jan duhjait ha bun ki jaka ha rilum Khasi Jaintia. Bun na ki nongrep kim da kheiñkor shuh ia u ne u jingthung ba kongsan bad u ba iarap ia ka koit ka khiah ki briew. Te khnang ban kham pynneh pynsah bad pynkhie im biang ia une u jingthung mynbarim, ka Jaintia Hills Development Society (JHDS) ha ryngkat ka jingiatreilang bad ka NABARD bad KVK Jaintia Hills, ki la pynlong da ka workshop ba shisngi halor ka phang “Revival of Millet Cultivation”.
Ha kane ka sngi la iadonlang ruh katto katne ki riew shemphang kiba khynthup ia u Bah Grevile Kharlukhi, AGM Nabard, u Director ka JHDS u FR. Manbha Pakem, U President ka KHUBLEI Germany u Garhart Albert, u Programme Associate ka Caritas India u Sir. Prabal Sen bad kiwei kiwei de ki nongshah khot sngewbha.
Haba kren sha ki lad pathai khubor, u Director ka Jaintia Hills Development Society u la ong ba ka Seng ka la pyrshang ban pynkhie im biang ia une u jingthung naduh ka snem 2018 ha ka shnong Samanong, West Jaintia Hills District. Shuh shuh u la ong ruh ba ha kaba sdang ka Seng ka la shem ba don tang lai iing kiba dang pynneh ia ka rukom rep ia une u jingthung ha kane ka shnong da ka jingthmu ban ai bam ia ki sniang. Hynrei hadien ba ka Seng ka la pynshlur lyngba ki training bapher bapher da kaba hikai kumno ban pynkylla ia une u jingthung sha ki jingbam bapher bapher kiba lah ban die ha kador ka ba bit, mynta ladon haduh 46 tylli ki longing kiba la sdang rep biang ia une u jingthung.
Haba phai sha une u snem 2023, ha kaba ka pynthei baroh shityllup ka rakhe pyndonburom kum u ‘Snem jong u Krai” lane International Year of Millets, u Asst. General Manager ka NABARD u Bah Grevile Kharlukhi u la kyntu bad pynshlur ia ki nongrep ba ki donkam ban phai biang ia rukom rep ki mynbarim khnang ban pynneh pynsah ia ka jingbha bad jingsboh ka khyndew. Shuh shuh u la ong ruh ba u Krai udei u jingthung uba khlainbor bad u bym juh iap klumar ha ki khniang jingpang lane ka jingkylla ka mariang (Climate resilient). U la ong ruh ba une u jingthung u iarap shibun ia ka koit ka khiah ki briew khamtam ha kane ka juk ba mynta. Kumta u la kyntu jur ia ki nongrep ba kin phai khmat biang sha ka rukom rep mynbarim khnang ban pynneh pynsah ia une u jingthung ba kongsan.
Ha kane ka sngi la ioh ruh ka jingai jinghikai bad jingbatai ia ka rukom rep bad ki jingmyntoi kiba ngi lah ban ioh na u Krai, ia kaba la ai da i kong Risa Lyngdoh, SMS KVK bad i Dr. L. Lyngdoh MBBS. Hadien kane ladon ruh ka jingpyni nam ia ki jingbam bapher bapher ia kiba la shet na u Krai ba la pyni da ki nongtrei jong ka HQI kiba dei ki millets artisan na Shillong bad ruh na ki nongrep jong ka Shnong Samanong.
Ha kaba kut jong ka prokram la don ruh ka jingai sngewbha da ki Symbai Krai sha ki nongrep ka Shnong Nongjngi bad Khanduli kum shibynta ban pynheh pynkhraw shuh shuh ia ka jingrep ia une u Jingthung.