Ka sorkar India lyngba ka thong “North East Discovery:Beyond Guwahati” kaba long ruh shi bynta na ka thong “Ek Bharat Shrestha Bharat” bad “Dekho Apna Desh” kaba dei ka prokram ban kyntiew ia ki kam jngohkai hapoh ka ri, kala pynbiang da ka Rel ia ki 156 ngut ki nongjngohkai pyrthei kaba la mih mynta ka sngi na nongbah Delhi Safdarjung Station kum ka jaka sdang jong ka jingiaid lynti.
Ia kane ka Rel la tip kum ka Bharat Gaurav Tourist Train, la kaweh lama ia ka, da ka Meenakashi Lekhi kaba dei ka Minister of State for External Affairs and Culture jong ka sorkar India mynta ka sngi ha station rel jong ka Sardarjung ha nongbah Delhi.
Na ka liang jong ka Lekhi kala ai ka jingiaroh ia u Myntri Rangbahduh ka ri u Narendra Modi uba la shimkhia ban pynkiew ia ki kam Rel hapoh ka ri. Ka kitbot kitrwiang ruh ia baroh kiba iashim bynta ha kane ka jingleit jngoh ia ka thaiñ North East India ba kin leit suk bad wan phai suk.
Kane ka Rel kala mih Delhi bad kan shimpor 14 miet bad 15 sngi ka jingleit lynti. Kine ki nongwan jngohkai (tourists) kin ioh ban leit jngoh kynthup ia ka Guwahati, Sivasagar, Jorhat bad Kaziranga ha Assam, ka Unakoti, Agartala bad Udaipur ha Tripura, ka Dimapur bad Kohima ha Nagaland, ka Shillong bad Cherapunji ha Meghalaya, hapoh katei ka song (package) bala mang. Ka dor ba ki tourist ki hap ban siew ha kane ka jingiaid lynti ka shong ha la ka jong ka jong katkum ki kamra ba ki pyndonkam ha ka Rel kaba sdang naduh ka dor kaba Rs.1,06,990/- haduh ka Rs.1,49,290/- tyngka bad kaba kynthup lang ia ka dor jong ka bai sah ha ki Hotel bad ka bai kali ban poi sha ki jaka jngohkai.