Mynta ka sngi ki dkhot jong ka Khasi Students Union Narpuh Circle ryngkat ki nongshong shnong jong ka shnong Sonapyrdi, ki la sakhi ïa ka jingïap pathar ki dohkha ha ka wah Lukha kiba la per ha sla um bad ïa ki daw ba thikna ym pat lah ban tip haduh ba thoh ia ka khubor. Na ka liang ka Seng ka la pynpaw ka jingsngew khia jur halor kane ka jingiap ki dohkha bad ki dkhot ka seng da lade hi ki la leit hiar bad sakhi ïa kane bad ka seng kan sa leit ruh ban ujor sha ki bor ba halor ban wad bniah ïa ka daw jong ka jingïap pathar ki dohkha.
U President jong ka KSU Narpuh Circle, u bah K.S.Suchiang, u la ïathuh ba u la lap ba ki don bun ki briew kiba la leit hiar sha wah Lukha ban khar ne tam ïa ki dohkha kiba la ïap bad kiba la jan ïap ruh ba kin ioh bam. Katto katne ngut ki nongshong shnong ki la ïathuh ha u bah Suchiang ba ka jingiap jong kine ki dohkha ka lah ban dei na ka jing jur u slap nyngkong ha kine ki ar- lai sngi, namar ki jakhlia ba mih na ki karkhana dewbilat kum ki fly ash, gypsum, dewïong, maw shun bad kiwei kiwei ki jakhlia ki wan tuid sha ka wah Lukha bad pynlong ia kine ki dohkha ban tlot ne iap noh, ki la ong ruh ba kane ka shait jia hi manla u snem ha kum kane ka por.
Ka seng ka kyntu ïa ki paidbah ban kiar ban bam ïa kitei ki dohkha ba ki tam na ka wah Lukha, ïoh ba kan ktah pynban ïa ka koit ka khiah jong ki, namar kumba long mynta, ki kynthei, ki khynnah ruh ki la hiar sha wah Lukha bad ki la muja ka tong dohkha.
Ka KSU Narpuh Circle, ka pynpaw ka jingsngew diaw haba ïohi ïa kane ka jingiap ki dohkha, la ong ba kane ka ju jia na ka por sha ka por, ki jakhlia kiba tuid, ki wan tuid nyngkong ha ka wah Lunar te yn da kane ka wah ka ïatyngkhuh bad ka wah Lukha, kumta ka wah Lukha ruh ka jakhlia lang bad ka um ka la kylla long bih bad ki dohkha kiba rit ba ria ki la ïap lut. Na ka liang ka seng ka la ju kyntu ïa ka sorkar kan leh eiei halor kane ka jingiap ki dohkha kaba ju jia man ka por, te mynta ruh sa shisien ka seng kan hap shim biang ïa ka synjam ba leit ujor sha ki bor sorkar, sha ka ophis u Deputy Commissioner ka East Jaiñtia Hills District ba dei ban wad bniah bha ïa ka daw jong ka jingïap pathar ki dohkha ha kane ka wah Lukha kaba ju jia man ka por.
