Ka West Jaiñtia Boxing Association (WJBA) mynta kala pynkut noh ïa ka lympung ïakura kaba la tip kum ka ‘All Jaiñtia Open Boxing Championship 2023’ ha ryngkat ka jingïatreilang bad ka ophis jong u District Sports Officer, West Jaiñtia Hills District ïa kaba la pynlong ar sngi lynter naduh hynnin ka sngi ha madan Daimasi Ladthadlaboh, Jowai.
Na ka liang u bah F.B. Basan MCS ka West Jaiñtia Hills District ula wan ban pynhap pyrda ïa ka ha ka jingdonlang u District Sports Association ka WJDSA u ma K. Passah, ki nongkitkam ka WJBA nalor kiwei de bad ki paidbah kiba la wan ban sakhi ia kane ka jingïakop ïakura.
Na ka liang u bah Basan ha ka jingkren ula ai ka jingïaroh ïa West Jaiñtia Boxing Association (WJBA) kaba la pynlong kum kane ka lympung ïalehkai hapoh ka District bad kan long ruh shi bynta ban sei madan ïa ki sap ki phong jong ki khynnah bad samla kiba don ka mynsiem ïa kane ka jait jingïalehkai.
Shuh shuh ula ong na ka liang jong ka bor District ka don beit ha ryngkat bad kino kino ki Association kiba mih shakhmat ban pynkiew ïa ka kam ïalehkai Sports hapoh ka District hi baroh kawei. Ha ka juh ka por u ai ka jingkitbok kitrwiang ïa ki nongiashim bynta ba kin long kiba treishitom khnang ba kin lah ban jop ha ka jingïaleh jong ki.
Ïa ki khusnam sha ki nongjop la sam da u kongkam jong kane ka sngi, ha ka liang ki kynthei ïa ka nam Best Boxer la ïoh da ka Dahakipaia Lyngdoh, ka nam Most Promising Boxer la ïoh da ka Heiniwanhi Nangbah, katba ha ka liang ki Shynrang ïa ka nam Best Boxer la ïoh da u Deibormitre Khonglah bad ka nam Most Promising Boxer la jop da u Marleki Suchiang.
Ha kane ka lympung la pyniakhun ha ki kyrdan Sub-Junior: 30-32 kg, Junior: 35-37, 40-42, 45-47, 48-51 & 60+. Youth: 46-48, 49-52, 52-53.5, 54-57, Elight: 49-52, 52-56, 56-60, 60-64 bad ka Women 50-55
Kum ban shu pynkynmaw ia kane ka ‘All Jaiñtia Open Boxing Championship 2023’ la wan ban plie pyrda hynnin ka sngi da u Superintendent of Police (SP) ka West Jaiñtia Hills District u B.D. Marak.
