Kum shi bynta na ka jingrakhe ia ka Road Safety Week 2023, ka ophis jong u District Transport Officer, East Jaintia Hills District, Khliehriat ha ryngka ki bor pyniaid District, ka tnad PWD, Police Department bad ka Health Department mynta ka sngi kila pynlong ia ka jingai jinghikai halor ka phang “Swachhata Pakhwada” ban pynsaphriang halor ka jingshngaiñ ha ka lynti iaid lynti ieng (Safer roads for all). Ia kane ka prokram la pynlong ha Khliehriat East Parking Lot, East Jaintia Hills District.
Haba ai jingkren sha ki nongniah Taxi u ma District Transport Officer, East Jaintia Hills District u ma R. Hinge ula iathuh ba ka jingiap na ka jingiakhuh kali ka kiew bha hapoh ka jylla, kane ka jingrakhe ia kane ka taiew Road Safety ka long da ka jingthmu ban wanrah ka jingpynsngewthuh sha ki nongniah kali ban iada na ka jingiatakhuh kali. Ula kren ruh shaphang kumno ban tip ia ki dak bala thoh ha ki signboard kiba don ha ki surok khnang ba ki nongniah kin sngewthuh ia ka jinglong jingman jong u surok bad tip ban kiar na ki jingma.
U ma Hinge ula kyntu ia baroh ki nongniah kali kiba la poi sha kane ka jingialang ba ki dei ban long kiba kohnguh iaki aiñ pyniaid kali (Traffic Rules) na ka bynta ka jingiaid beit iaid rynti bad ka jingiada na kano kano ka jingma ba lah ban mih, namar ka jingkohnguh ia kine ki aiñ ka iarap ban pynduna ia ka jingjia ba sngewsih. U la ong ruh ba ia kum kine ki prokram yn sa pynlong ha kylleng ki bynta jong ka District haduh ka 31 tarik mynta u bnai.
Kiwei de kiba la ai jingkren ha kane ka jingialang ki kynthup ia u bah B. Warjri, Sub Inspector. i/c Traffic Cell, Khliehriat, u bah H. Dkhar, Motor Vehicle Inspector jong ka ophis DTO, Khliehriat, u ma T. Dkhar, JE ka ophis EE PWD Roads, East Jaintia, u ma I. Dkhar Enforcement Inspector ka DTO Khliehriat bad kiwei.
