Ka ophis treikam jong ka Commerce & Industries ka jylla ha ryngkat ka jingïatreilang bad ka Indian Institute of Packaging, Kolkata mynta ka sngi kala pynlong ïa ka prokram ai jingai jinghikai ïa ki nongthawkhiew ka Larnai bad Tyrshang (Black Pottery Products) shi bynta na ka prokram “Azadi ka Amrit Mahotsav” kaba la long ha District Commerce & Industries Center, Jowai.
Ki nongthaw khiew na Larnai bad Tyrshang kiba la wan sha kane ka prokram ai jinghikai kila ïoh shibun ki jingbatai ba bniah halor kumno ban pynïaid ïew ïa kine ki mar ba la shan da ka khyndew kiba long ki mar ba dawa bha ym tang hapoh ka jylla hynrei wat shabar kumjuh.
Ha kane ka sngi la batai bniah sha kitei ki nongthaw khiew ba kin pyndonkam ïa kitei synduk ha kaba song ia kitei ki mar, kiba la pynwandur da ka Indian Institute of Packaging, Kolkata kaba la dep ban wad bniah bha shaphang ka rukom song ïa kine ki khiew kiba la pynmih na kitei ki ar tylli ki shnong.
La ïathuh ruh ba kitei ki synduk kin ïarap ïa kitei ki mar (khiew) ban lait na ka jingpait haba thep hapoh synduk ha ka por ba pynïaid ïew namar ka jingsong ïa ki ka don haduh 3 kyrdan bad ka jingitynnad jong ki dur ki dar bad ki jingthoh kiba lah ban pynithuh ïa kitei ki mar hapoh (packet) bad kane kan ïarap bad pynsuk ïa ki nongthieh ba pule ïa ki jingsong hashwa ban thied.
Kitei ki nongthaw khiew haba ïoh bynta ruh ban pynsngew ïa ka jingdonkam jong ki na ka bynta kitei ki synduk kot, ha ka juh ka por ki don ka jingkyrmen skhem ban sdang ïa ka kam jong ki katkum ka juk ba mynta ym shuh da ka song mynshwa da ki kot bad ki pla plastic kiba pynjaboh ïa ka mariang.
Na ka liang ki nongai jingbatai kila wan poi na ka Indian Institute of Packaging, Kolkata kaba dei kawei na ki Autonomous body hapoh ka Minister of Commerce & Industry jong ka sorkar kmie kiba kynthup ïa u B. Das uba dei u Project Head. Ha ka jingbatai, ula ong kitei ki song synduk bala pynwan dur da katei ka Institute kin ïarap shibun eh ban buh ïa kitei ki mar ha ka por ba pynïaid ïew wat shabar jong ka jylla ban lait na jingpait jong kitei ki khiew.
Ula kyntu ruh ïa ki nongthaw khiew jong kitei ki ar shnong ba kin pyrshang ban shna ïa ki khiew da kaba pyndonkam da ki bor jong ka juk stad ba mynta khnang ba kan ym shim por palat, ha ka juh ka por kin ïoh ïa ka juh ka jingheh jong ki khiew, da kaba ong ruh na ka por sha ka por ïa ki khiew ba shan da ka kti ym shem la ïoh ïa ka juh ka jingheh (size).
Kiwei de kiba ai jingkren kila buh ka jingkyntu ïa kitei ki nongthaw khiew jong ki ar shnong ban kin shim khia ïa kane ka kam bad ban pynneh pynsah ïa ka na ka bynta ka pateng ba dang wan, khnang ban kan long ka jingkyrkhu ïa ka lawei.
La ïathuh ruh hapoh ka jylla la phah jied haduh 5 tylli ki jait tiar ban pynithuh ïa no ba yn pynïaid ïew bha ïa ki da kaba thaw ïa ki song synduk, hynrei la jied ïa kine ki khiew (Black Pottery Products) napoh ka thaiñ West Jaiñtia.
Ha kane ka sngi la ïadonlang ruh da u Deputy Director Mahatma Gandhi Institute for Rural Industrialization Maharashtra u V. Rao, kumjuh ruh u Deputy Director (Marketing) bah M.L. Wanshnong, u General Manager District Commerce & Industry Center (DCIC) WJHD bah A. Malngiang bad ki nongtrei ka DCIC ha ryngkat kitei ki nongthaw khiew na Larnai bad Tyrshang.