Ka Joint Action Committee Nartiang Khanduli Area (JACNKA) kaba kynthup ia ki Rangbah Shnong, Senghalang, Tourist Drivers bad ka Shnong Mynsngat, Shnong Murap, ha 30.03.2023, kila pynlong ia ka jingiaid paidbah (Public Rally) kum ka dak ka jingpynrem jur ia ki runar nong pyniap briew bad dawa na ka sorkar ba ym dei ban pylait shuh ia kine ki nongpyniap briew bad set patok shi jingim ia u Meban Talang para jong u (L) I Love you, u Jimmy Kyndait kiba na ka shnong Murap bad ia u Sambun Dkhar na ka shnong Mynsngat kiba donkti ban pyniap beiñ bad shim ia ka jingim u Pynkhreh Surong.
Ka jingiaid paidbah mynta ka sngi kala sdang ha por 11 baje mynstep ha shnong Mynsngat, ka ba sdang na Dong Iurim bad pynkut ha Iaw Mynsngat ha kaba la pynlong ia ka jingialang paidbah. Ha kane ka jingiaid paidbah da ki spah spah ngut ki paidbah ryngkat ki khynnah skul, ki nonghikai kila iasnoh kti lang sha kane ka rally ryngkat ka jingrah ia ki placard ba don ki jingthoh pynrem ia kitei ki lai ngut ki runar.
U waheh shong ka shnong Mynsngad u ma Pham Pakma haba kren ula ong ba lada don kum kine ki briew hapoh ka shnong ka thaw ne ka thaiñ ngi kiba iaid ba ieng ka buh ka jingma kaba khraw kumjuh ka long ka jingjah burom ia ka shnong ka thaw haba don kum kine ki jait briew thrang snam.
La ioh ruh ki jingkren na u ma Bijoy Tariang uba dei u kpa u Meban Talang, uba la pynpaw ia ka jingsngewsih kaba khraw ha kaba tang na ki khun jong u ki la mih haduh ar ngut ban leh ia kane ka kam pyniap breiw ne shim ia ka jingim kiba lui-lui, na ka liang jong u, kum u kpa u la ong ba na ka liang ka ïing ka sem ne ki kmie ki kpa ngi la dep ban sneng ban kraw ia la ki jong ki khun ha ka lynti kaba dei hynrei ynda ki la rangbah kila mih na ïing ban leit trei ngim tip shuh ki leh aiu ne kumno ka rukom trei jong ki. U la ong ba lada shah ka aiñ la dei ban shim noh ia ka jingim jong kum kine ki jait briew wat lada dei ki doh ki snam ruh. U la ong lada jia ba ki lait ne ioh jamin nano re nano u kyntu ia ki paidbah ba ym dei ban ai lad ia kum kine ki jait briew ban don ha ka pyrthei.
Na ka liang ka kmie u Sambun Dkhar, ka kmie Meban Talang haba kren ka la ong ngi haba ngi la kha ia ki khun ngi la ri la sumar khop ia ki ryngkat ka jingsneng jingkraw kumno ban im tip briew tip blei ban tip akor burom, kala ong ruh ba ym juh don hi ruh ki kmie ki kpa kiba ju sneng ia ki khun ban kin im ka jingim kaba sniew. Na ka liang jong ka, ka kyntu ia ki bor shnong ba ym dei ban buh dak sniew ia ka ïing ka sem ka kur ka jait jong ka namar na ka liang ka ïing ka sem kim don kti ei ei bad u khun jong ki halor kane ka kam ba u la leh.
Ia ka jingialang la pyniaid da u ma Velson Surong, bad la ioh ruh ia ki jingkren na u ma Damian S. War Waheh Shnong Namdong, ma Phermi Suting dkhot HITO, ma Damonmi Dkhar Waheh Shnong Moodop uba long ruh u President ka JACNKA. Hadien ka jingialang na ka liang ki paidbah bad ki nongialam kane ka rally ki la thang ruh ia ki dur jong lai ngut ki runar.
