U Myntri sorkar Jylla ba dei peit ia ka tnad Animal Husbandry & Veterinary etc, u bah A. L. Hek mynta ka sngi ula plie pyrda ia ka jingai jinghikai kaba la tip kum Star Elite Pathway ha SAI, NEHU, Shillong. Ia kane ka jingai jinghikai la pyniaid da ka Meghalaya State Olympic Associations (MSOA), Arms PT- Edge10- Sportality Team ha ka jingiatrei ryngkat ka Department of Sports and Youth Affairs, Government of Meghalaya.
Ha kane ka sngi sdang la iadon ryngkat lang u Chief Secretary ka jylla u bah D.P. Wahlang, u Ian Campbell, Olympian, 1980 Olympics, u Jesper Olsen u Director ka Future Football (u Player World Cup ba rim ka Denmark) u bah John Kharshiïing ba dei u Working President ka MSOA nalor kiwei de.
Haba ai jingkren ha kane ka sngi u bah Hek ula ai ka jingiaroh ia ka MSOA kaba la shimkhia ban pynlong ia kum kine ki jingai jinghikai ka ba iarap ia ki riew sport jong ka jylla ban pyni ia ki sap ki phong jong ki ha ka liang ka kam sport. U la pynpaw ba ka long ka jingkyrment kaba khraw ia ka jylla ban iohi ba kiba ki nongialehkai sport ki wan ban iashim bynta ha kane ka jingai jinghikai bad kyntu ia ki ban kin leh bha bad kohnguh ia ka jingbtah jong ki nongai jinghikai (Coaches).
